سيدة بدعوى نفقة: ”بنتي سابت الجامعة عشان المصاريف.. وجوزى بيهددني بمياه النار”

بوجه ظهر عليه قسوة ومرارة الأيام، تقف سيدة في الخمسينات من عمرها، تشكو للقاضي بمحكمة الأسرة بالجيزة قسوة ما تتعرض له من زوجها بعد زواج استمر لأكثر من ربع قرن، كانت له خير الزوجة والسند.

وبدموع الحزن وصوتٍ مكتوم، بدأت الزوجة حديثها للقاضي: "اتجوزنا من 25 سنة، وربنا رزقنا بولدين وبنت، كنت عايشه تحت رجلين جوزي وأولادي، فاتحه البيت بالجنيه اللي ربنا يرزق به، عمري ما اشتكيت ولا حسسته إن في حاجه ناقصنا، برضى بالقليل وعايشه علشان سعادته وبخدمه بعنيا".

وتابعت: "في يوم لقيته بيقولي أنه اتجوز عليا، والخبر وقع عليا زي الصاعقة، عمري ما توقعت أنه يعمل فيا كدا بعد عشرة 25 سنة وأني عمري ما قصرت معاه في حاجة، لكنه مكتفاش بالجواز من واحدة تانية بل امتنع عن مصاريفنا أنا وأولاده".

وأكملت: "معرفش حاجة عن العالم برة ولا عمري اشتغلت، ومكنتش عارفة أعمل ايه، بنتي في الجامعة سابت الجامعة بسبب أنها مش بتلاقي مواصلاتها كل يوم، وابني الصغير باص المدرسة رفض يعدي عليه علشان مدفعتش المصاريف، وفجأة لقيت حياتي أنا و أولادي بتدمر".

واختتمت حديثها: "صاحب الشقة بيهددنا يطردنا من الشقة بسبب تأخير الإيجار، اضطريت أرفع على جوزي قضية نفقة علشان نقدر نعيش أنا وأولادي، لكنه بيهددنا من يومها بالقتل او أنه يحرق وشي بماية نار وحياتي جحيم".

لجأت الزوجة للمحامي مصطفى الكيلاني، والذي أقام دعوى نفقة تحمل رقم 45 لسنة 2023 محكمة أسرة الجيزة، ومازالت المحكمة تنظر القضية ولم يتم الفصل فيها حتى الآن.