بيتفرج على كارتون.. ”منى” بدعوى خلع: ”جوزي بيسيبني في الخناقات ويجري”

بوجه شاحب، وعقل شارد وقفت "منى" أمام قاضي محكمة الأسرة بالتجمع الخامس، تروي معاناتها مع زوجها ووصفته بـ"العيل"، لتخليه عنها في أزماتها ومشاهدته للأفلام الكرتونية باستمرار.

وبعيون تفيض الحيرة من هوال الموقف الذي تمر به لأول مرة في حياتها قالت السيدة للمحكمة: "طول الوقت حاسه إني متجوزة عيل صغير، مش راجل كبير وناضج إطلاق، طباعه أختلفت بعد الجواز وتصرفاته بقت غريبة جدا، مش قادر يستوعب أنه راجل كبير ولا قادر يتحمل المسؤلية".

وتابعت: "تصرفات جوزي كلها طفولية، بحس إنه في أولى ابتدائي، بيشوف كرتون كتير جدا، بيقضي معظم الوقت قدامه مش بيزهق، أوقات يشتري لنفسه لعب أطفال ويلعب بيها، مفيش حاجه تدل على أنه راجل ناضج يقدر يفتح بيت ويتحمل مسؤلية حد.. عايز اللي يشتري له لعب يلعب بيها ويسلي وقته".

وأكملت: "الحياة بقت صعبة والعيشة بقت مستحيلة معاه، مش حاسه بأمان معه، وقت ما بحتاجه مش بلاقيه في ظهري وساندني.. في مرة اتخانقت مع سواق ميكروباص سابني وجري، وده خلى العيشة بينا كانت صعبة، إني أحس اني لوحدي شايله كل حاجة إحساس صعب".

واختتمت منى حديثها: "كل يوم تصرفاته بتبقى أغرب من اليوم اللي قبله، وكل يوم حاسه إني في خطر ولوحدي، فقررت أقيم ضده دعوى خلع تحمل رقم 5340، لأن الحياة لازم تستمر في توازن والمركب تمشي مفيش حد أقدر أسند عليه في الجواز إلا جوزي وطلع عيل".