هالة أمام محكمة الأسرة: ”جوزي بيفصل الكهرباء عن التلاجة عشان ماخدش الأنسولين”

بصوت يتألم وعيون تنهمر منها الدموع الحارقة وجسد أهلكه المرض، روت "هالة" تفاصيل مأساتها مع زوجها على مدار 14 عامًا رفض خلالها الإنفاق على الأسرة.

وتقول السيدة في تصريحات خاصة لـ"النهار"، إن زواجها استمر 14 عامًا أنفقت فيها على المنزل بمساعدة أهلها بسبب تعنت زوجها في تلبية طلباتها، ورددت: "عمري في يوم ما طلبت منه حاجة محتاجها في البيت وجابها.. كل مصاريفنا إعانة من أهلي.. لو في يوم جاب كيلو طماطم يجيبه حامض.. كنت بحاول أمشي الدنيا لكنه كان إنسان غريب في تصرفاته".

وتابعت: "أنا مريضة سكر ماشية على الأنسولين، جوزي كان بيفصل الكهرباء عن الثلاجة علشان جرعة الأنسولين تبوظ وأتعب.. وكان بيقولي العيال هم اللي فصلوا الكهرباء.. وكل فلوسه بتروح على التدخين وكان بيراكم علينا الإيجار والديون".

وأكملت: "في يوم ضربني وأنا حامل في ابني الكبير سبب ليا نزيف وسابني وراح الشغل.. وراح خانني وواحد شافه من شركته وهو سارق عربية الشغل وبلغهم هناك، رجع أخد تقرير المستشفى قدمه في الشغل أنه كان معايا وهو كان مع ست تانية".

وأردفت: "حياتي بقت مستحيلة معاه.. أقمت ضده دعوى خلع وبعدها قضية تمكين ولكنه مصمم يهدد حياتي أنا وأولادي".

وأقام محمود سيد الأبنودي المحامي، محامي السيدة، دعوى خلع تحمل رقم 1043 لسنة 2020، و أقام دعوة نفقة تحمل رقم 1787 لسنة 2020.