شروق أمام محكمة الأسرة: ”جوزي بيبربش وهو بيكلمني ورفض يروح لدكتور”

دخلت الشابة العشرينية "شروق" إلى قاعة محكمة الأسرة بحلوان وهي تجر أذيال الخيبة وتخفي كدمات ارتسمت بعموم جسدها، وبعيون تنهمر منها الدموع الحارقة جلست على أحد المقاعد منتظرة صوت الحاجب الجهوري ليصدح برقم قضيتها.

لم تمضِ إلا دقائق قليلة ووقفت الشابة أمام القاضي وبجوارها دفاعها ورددت بصوت حزين: "جوزي بيبربش وبيحول وهو بيكلمني وقولتله أكتر من مرة يشوف دكتور بيرفض ويضربني"، موضحة تفاصيل معاناتها مع زوجها التي بدأت بعدما شاهدها في أحد المناسبات العائلية ثم تقدم لخطبتها إلا أن أهلها رفضوا لكنها أصرت على إتمام الخطبة لإعجابها به.

ورددت "شروق": "أنا قولت إنه فارس أحلامي مش هتجوز غيره.. وأهلي وافقوا اتجوزنا.. والأمور بينا كلها كانت تمام لحد ما بدأت ألاحظ أنه بيبربش كتير وبيحول لمدة دقائق"، متابعةً أنها طلبت منه مرارًا الذهاب إلى طبيب لتشخيص حالته بعد تكرار حالة الحول و"البربشة" إلا أنه رفض رفضًا باتًا.

وأشارت: "روحت أنا للدكتور وشرحت له الحالة، وكتب على أدوية ورفض يأخذها، الموضوع اتطور معه وبقي بيحول بالساعات، وبقي يستني صاحبه يأخذه من إيده ينزله الشغل ويرجعه والموضوع بقى صعب، قولتله لازم دكتور حالتك اتدهورت خالص، ضربني كان يموتني في إيده".

وأكملت: "روحت لأهله أقولهم ويساعدوني أقنعه يزور دكتور لكن فوجئت أنهم بيقولوا ليا هو رافض يزور دكتور لأنه بيشرب مخدرات، وكمان علشان أنا معرفش حاجة عن الموضوع، طلبت منه الطلاق لكنه رفض"، مؤكدة أنها أقامت دعوى خلع ضده لخوفها منه ومن تصرفاته حملت رقم 238 لعام 2021.