غادة عبدالرازق : ماما توفت وهي راضية عني ..وشيلت فكرة الجواز من دماغي

أكدت الفنانة غادة عبدالرازق عبر تصريحات تليفزيونية لها : أن عقلية الراجل المصري لا تتقبل فكرة المرأة القوية ، ولا نجاح المرأة ، وتفاصيل مشاركتها في فيلم الريس عمر حرب .

وقالت غادة : عقلية الراجل المصري لا تتقبل عقلية المرأة القوية زيي ، والراجل مبحبش الست تبقي أقوي أو أنجح منه ، واللي قابلته في حياتي العاطفية الراجل اللي بيدرس علي كرامة المرأة لأني ناجحة ، والأمان في أقرب الناس ليا مش في شريك الحياة ، وشيلت فكرة الجواز من دماغي .

أما عن شخصيتها في فيلم الريس عمر حرب قالت: الفيلم ده من أكتر الأفلام اللي بحبها جدا ، لأن الفيلم ده جرئ جداً وقصته غريبة ، أنا حبيت الدور أوي كان مرعب وغريب ومش عارفة كنت هلعبه من أنهي جهه ، وبعد الفيلم ما الفيلم اتعرض كل الناس كانت متخيلة أن الشخصية كانت مرسومة كدة ، ولكن أنا اللي رسمت الشخصية .

وعن مشهدها الشهير مع الفنان هاني سلامة علقت قائلة: كنا حاطين روج تحت الأظافر علشان يبان أن خربشته ، ولكن أنا عشقت الفيلم ده وحبيته وأكيد الحاجات دي بتحصل والكاتب مش جايب ده من برا .

وتحدثت الفنانة غادة عبدالرازق عن والدتها قائلة : كانت بتعشقني أنا وروتانا بنتي ، وكانت راضية عني وأكبر دليل أنها طلبت تشوفني قبل وفاتها علي طول أنا بس ، وقالت لي خلي بالك من نفسك ومن روتانا، وأنا اتخضيت لأن أول مرة أشوف حد قدامي كدة .