رئيس جمعية الكومبارسات: أول ظهور لشيرين عبد الوهاب كان معايا ومكنتش بتعرف تمثل .. وعلا غانم كانت من المجاميع

كشف الريجسير ورئيس جمعية الكومبارسات إبراهيم عمران عن كواليس اكتشافه للفنانة جيهان نصر في بداية مشوارها الفني : كنت بعمل فيلم أسمه زيارة السيد الرئيس مع الفنان محمود عبد العزيز وهياتم وحسن الاسمر، وجالي استاذ محمد راضي قالي عايز بنت شكلها جميل وفلاحة وتطلع مرات حسن الاسمر ووشها مصري.

أضاف عمران خلال حواره مع الإعلامية انجي هشام في برنامج المنسي عبر قناة هي : احنا زمان كنا بنمشي بشنطة فيها أجندة العناوين والصور وبكون عارف خط سير الممثل وأعرف اجيبه من تحت الأرض، فطلعت الشنطة وقلتله اختار الصور وعينه وقعت على جيهان نصر، فقولتله برافو عليك البنت دي جميلة جدا قالي عايز أشوفها، قومت روحت لأبوها البيت وكانت بتعمل اعلانات ومرضيش في البداية قولتله دي فرصة ومش هتتعوض وأقنعته.

تابع : جت جيهان وعملها كاستينج واقتنع بيها وعملت البطولة بـ ٣٠٠٠ جنية، وكمان في فيلم" البطل " كنت بعمل الفيلم ده.

كما كشف عن الفنانين المشاهير الذي شهد على بدايه مشوارهم الفني قائلا : علا غانم كانت من ضمن المجاميع كمان حنان شوقي كانت من المجاميع وكانت بتجتهد لحد ما بقت نجمة . محمد هنيدي كمان كان بيطلع في أدوار صامتة وكنت بكلمه على تليفون الجيران، شيرين عبد الوهاب في أول ظهور ليها في فيلم ميدو مشاكل مكنتش بتعرف تمثل وكان معايا.