ميس حمدان: خالد يوسف هزقني علشان رفضت المشاهد الساخنة وقال لي أمثالك هيبوظوا الشغلانة

كشفت الفنانة ميس حمدان، تفاصيل ترشحها لبطولة فيلم «ويجا» للمخرج خالد يوسف، بدلًا من الفنانة دوللي شاهين، والذي كان سببًا في اتهام الأخير لها بأنها ستفسد الفن، بسبب رفضها لمشاهد القبلات الموجودة في الفيلم.

وبحسب «حمدان»، في تصريحات تلفزيونية: "خالد يوسف زمان كان في موقف حصل، هو حمقي شوية في ردود أفعاله، هو كان عايزني في الدور بتاع دوللي شاهين في فيلم ويجا، وروحت المكتب بتاعه وكان فيه هاني سلامة، وكان بيقنعني بالدور وأنا ساعتها كان عندي تمسك فظيع إني مش هقدر أمثل مشاهد القبلات والمشاهد الساخنة في الفيلم، وكان بيقولي أنت كدا مش فنانة وبطلوا الطريقة دي، وأنتم اللي بوظتوا الفن وزمان الفنانين ما كانوش بيفكروا بالطريقة دي وكانوا محترمين بردو".

وتابعت: "هو ليه وجهة نظر وتُحترم، وأنا حسيت إني باتحط في زاوية قولتله طيب اديني فرصة أروح البيت أسأل ماما وأنا ما كانش عندي الجرأة أعمل المشاهد دي، واعتذرت وقولتله أنا مش هاقدر أعمل الدور دا، وزعل وهزقني وقال لي بما معناه اللي زيي اللي بوظ الشغلانة".

واستطردت: "الصحافة عرفت والخبر انتشر وأنا كمان قولت إني كنت هعمل الفيلم، وخالد يوسف كلمني وإداني على دماغي وقالي بما معناه أنت عايزة تربطي اسمك بي وتشهري نفسك، وما تجبيش اسمي تاني على لسانك وما تتكلميش علي خالص، وخدت الكلام وسكت".