مدحت صالح عن مشروع إحياء أصوات المطربين الراحلين بالذكاء الاصطناعي: بنحافظ على التراث

كشف الفنان مدحت صالح عن رأيه في مسألة استخدام الذكاء الاصطناعي، في إعادة إحياء أصوات مطربي الزمن الجميل، مُشيرًا إلى مشروع المُلحن عمرو مصطفى، وأنه فرصة للحفاظ على التراث الغنائي.

وقال «صالح» خلال مؤتمر صحفي بدار الأوبرا المصرية: "مش عارف عمرو مصطفى قال إيه بالظبط ولكن في إمكانية إننا ناخد بصمة صوت أي حد، سواء رحل عن عالمنا أو عايش، ويتم توظيفها".

وأضاف الفنان مدحت صالح: "فيه تكنيك تاني في التكنولوجيا، إننا ناخد الصوت فقط ونركب عليه مزيكا، ودا المشروع اللي كنت باقدمه للدولة عشان نشتغل عليه في الإذاعة، وممكن ناخد الأصوات دي ونخلي كل الناس مواليد 2023، وأنا بعمل كدا".

وتابع: "عمرو مصطفى بيلعب في التقنية دي، بياخد صوت حليم وبيعمل لحن، وبردو الست أم كلثوم، فماحدش هيقرب من البناء الأساسي للحن، مش هلعب في اللحن ولكن بنحاول نزود متعة الجرعة السمعية، واحنا عارفين الكلمات بس عايزين جرعة أكتر من المزيكا، الشبع من المزيكا، كل أغنية قبل كدا كنا بنقول عايز أشبع مزيكا، هيحصل دلوقتي".

وأكد أنه المشروع ما هو إلا محاولة للتحديث والحفاظ على ما تبقى من التراث الغنائي، لكبار المطربين سواء الراحلين أو ما بقي منهم على قيد الحياة، وأن الفكرة هي حالة حب لكل فنان لعدد من ملحنين يختار منهم، قائلًا: "باحلم إن كل زملائي يكملوا ويشوفوا بيحبوا مين من الملحنين ويقدموا أعمالهم، بس الإضافة إننا بنعيد هرمنة الأعمال دي، وطول عمرنا نطلع نقول أعمال هو بيحبها، انا عايزين نحدث الموضوع لأن دا هدف، لأن الزمن بيتطور".

واختتم مدحت صالح حديثه قائلًا: "ندي فرصة لما يكون عندي الهرموني بتدي فرصة للفرق الصغيرة، لما يشتغل هنلاقي نفسنا بنسمع الأعمال وبنحدثها، عندنا إمكانيات عظيمة في الجغرافيا دار الأوبرا، عندنا أشهر عازفين مافيش حاجة ناقصة غير أننا نحافظ على تراثنا، ونقوله للناس وإعادة صياغة للمكتبة الموسيقية".