ماجدة خير الله: «حلا شيحة ممثلة محدودة وبتهين الفن والمهنة وبتاخد فرص غيرها»

علقت الناقدة ماجدة خير الله، على قرار عودة الفنانة حلا شيحة للتمثيل مرة أخرى، بعد «تحريمها له من قبل».

وقالت ماجدة خلال مداخلة هاتفية فى احدى البرامج: «رأيي أن غياب حلا شيحة أو وجودها لا يترك أثر، وإحنا بندي قيمة كبيرة جدا بالحديث عن وجودها أو اختفائها، هي فنانة محدودة الموهبة وفي عشرات من الممثلين والفنانين الموهوبين بجد محتاجين إلى فرص، وافتقادها مش حاجة مهمة.. وهناك فنانات سواء خريجي معهد أو لأ ولكن موهوبين جدا، وأخذوا فرص واثبتوا وجودهم».

وتابعت ماجدة خير الله: «إحنا بنضيع وقت مع حد مش مهتم بالفن، مش مهتم بالمهنة، بل بالعكس بيسئ إليها، بيخلي الناس تعتقد أن المهنة دي شغلانه كده يقدر يخش فيها ويطلع زي ما هو عايز».

وأضافت ماجدة خير الله: «وجود حلا شيحة مع عادل إمام وشريف منير تفتكري هي اللي كانت موقفه الفيلم على رجله؟ لاء طبعا حتى في اللمبي، كانت عبلة كامل، هي حظها أنها كانت بتتواجد معها ناس هما اللي شايفين الحكاية، هي كانت مجرد بنت لطيفه شكلها حلو، خلاص الكلام ده من 15 سنة، لكن دلوقتي لم تعد البنت اللطيفة، في 15 مليون واحدة طلعوا بعد كده موهوبين وحلوين وسنهم مناسب.. احنا ليه ماسكين في أهداف واحدة مش مهتمة بالشغلانه الفنية خالص».

وأما عن حديث نقيب الممثلين بأنه سيأخذ رأي الأسرة الفنية حتى تعود حلا شيحة، فقالت ماجدة خير الله: «والله يرحبوا بيها إذا متقبلينها، لكن هل الجمهور هقدر أفرض عليه حب فنانة هي مش مهتمه أو بتهين المهنة والله لو ده اللي ماشي يتحملوا بقى ؟! الناس مش هتبقى مرحبة الناس هنا اللي هو الجمهور والشركات المنتجة لازم تكون حريصة على العمل الفني ممكن تعمل ربكة لشركات الإنتاج وربكه لزملائها، لو الناس هتتحمل هذا العبث اوكي اكننا بنقدم فن مفيهوش مسئولية».

واختتم ماجدة خير الله حديثها: «مفيش شخص على وجه الكرة الأرضية معندوش مشاكل نفسية لكن مترميش مشاكلك النفسية وعقدك على الآخرين، حلا شيحه بتاخد فرصة بتاعه آخرين فإذا لم تكن جاده وتموت نفسها علشان تثبت هذه المره أنها تستحق هذه الفرصة فعليها أنها تبعد للأبد».