منال سلامة عن دورها في مسلسل «الأصلي»: فايزة مش شريرة ونور الشريف نصحني أركز في التفاصيل

كشفت الفنانة منال سلامة، خطة تحضيرها للمشاهد الخاصة بشخصيتها في مسلسل «الأصلي»، المعروض حاليًا عبر فضائية «DMC»، وأدوارها في جميع الأعمال التي تقدمها.

وقالت «سلامة»، في تصريحات إذاعية: "أنا معترضة على فكرة إنها شريرة، فايزة سيدة ما كملتش تعليمها، وأبوها ميز أختها عنها، واتجوزت شخص كان بيحب أختها".

وتابعت: "فايزة هي شخصية مش متحققة في كل حاجة، وبتطالب بورثها بطريقة تسخين أخواتها على فاطمة، وتبان قدام فاطمة إنها غلبانة، ولكن هي مش شريرة خالص والناس هتكتشف إنها إنسانيتها وليه وصلت للحالة اللي هي فيها دي، ويهمني دايمًا إن لما الناس تقفل التليفزيون تفتكر شخصياتي، سواء فايزة في الأصلي، أو دوري في الملكة نازلي".

وعن كواليس تحضيرها، لأدوارها في أي عمل، تحدثت الفنانة منال سلامة: "من أول ما بدأت تمثيل عملت لنفسي كراسة بكتب فيها كل مشاهدي وملابسي فيها، وبعد شوية فهمت إن دي شغلانة حد في اللوكيشن اسمه الراكور، ولما اشتغلت مع أستاذ نور الشريف لقيته بيعمل نفس الشيء، وأضاف لي تفاصيل كتيرة ونصحني إني أخد بالي من التفاصيل واللزمات، ودا بيريح المخرج لأنه عارف إنه بمجرد ما هيقول لي المشهد اللي هاصوره دلوقتي، هيلاقيني جاهزة باللبس الخاص به بسرعة".

يُذكر أنَّ مسلسل «الأصلي»، يضم مجموعة مميزة من نجوم الفن، أبرزهم الفنانة ريهام عبد الغفور وإيهاب فهمي ومنال سلامة ويوسف عثمان وسارة نور وشاهيستا سعد وأحمد والي وجلا هشام وإسلام جمال، وآخرين.