علاء الدين سويلم يكتب عن الدولة الوطنية
للتنوير فقط ملتمسا وجه الوطن فقط
( فجيلي لايملك الان الا ان يقول بصدق كلماته الاخيره )
منشوري السابق ذو الخلفيه الخضراء عن الدوله الوطنيه اظنه محتاج تفاصيل اكتر لان هذا الموضوع في شرق اوسطنا تايه ومالوش صحاب وكمان سبب انه قدر هايحصل هايحصل حتي لو تأخر لكن اظن زمانه قد اظلنا …
وكالعاده سين وجيم لزوم التبسيط لان المواضيع دي غبيه ومنشوراتها بتبقي تقيله الدم
- هي طبيعه الدوله في الشرق الاوسط كله ايه ؟
دول قٰطريه تفخر بتاريخ ماً اغلبه هزائم وساعد علي تكريسه استبداد بالوراثه واتفاقيه ساكس بيكو واعراق تسود وافكار تمور …
- امتي ظهر التعريف بتاع الدوله الوطنيه ؟
مع عصر النهضه في اوروبا وكانت مرجعيته اول وثيقه محترمه وهي الماجنا كارتا ورواد فكر واتممه ثورات كرومويل والثوره الفرنسيه … وطبعا ساعد علي انتشاره كشوف جغرافيه وثروات انهالت وتجاره دوليه واختلاط الناس جغرافيا والتركيز علي صنع وعاء جامع عبر عن نفسه في برلمانات ذات انياب ونقابات ذات اظافر وحريه نشر وكل ده لصهر التجمع البشري في قالب مقبول من الكل لحمايه الكل واسمه القانون ودوله المؤسسات …
- معناها البسيط ايه ؟
دوله الشعب وللشعب وبتراضي ( للخضوع الي مؤسسات ذات عمل واضح وقانون عام يخضع له الجميع ) وتحييد اي نوع خايب من التجمعات التي يتوهم مؤيدوها انها ممكن ان تستعيض عن الرضا العام مخليه الساحه لهبل زي الدوله الدينيه او المذهبيه او العرقيه …
- وهو شرق اوسطنا فيه ايه ؟
بتنويعات حكم اسري مع ( امارات غير فاعله ) للدوله الوطنيه كالمؤسسات والبرلمانات والدساتير واظن معركه آخر دستور كانت مشينه بكل المقاييس لانها كانت ( تكويش علي اد ماتقدر من قوي المجتمع لصالح نفسها ) ناسيين ان الدستور في اصله اطار بيقول ان الدوله الفلانيه ( ككيان سياسي اجتماعي جغرافي ) ملامح مبادئها العامه هي ( بالتفاعل مع مواطنيها لصالح امور حياتهم وثقافتهم ووحدتهم ) تري طريقها بالشكل الفلاني مع نبذ اي ( كوته ) لفئه او مذهب او دين …
- امال مايسموه الربيع العربي عمل ايه ؟
فجر قضايا وثارات تاريخيه اجتماعيه مسكوت عنها ووضعها امام اسئله تخص المستقبل وعنوانها … هل سنبقي كما كنا ام انه آن اوان التغيير المؤسسي …
اعاد ببساطه واظن الكل ملاحظها السلطه للشعب بحضور مؤثر وضاغط حتي لو خفي بعد حكم طبقه خاصه استولت وحدها علي كل الامور بشرعيات عجيبه كما شرعيه الميراث او شرعيه مايسموه انجاز …
اقترب الرأي العام من اوثان كانت من الصعب الاقتراب منها بالقول او الفعل زي نقد البرلمانات والاعلام والمسؤلين والقرارات المجحفه وكل ده مش سببه ذيوع وسائط التواصل بس لكن لانه ثوره صامته تطلب الدوله الجامعه فقط التي تعمل ( لكل ) مواطنيها مش ( لبعض ) مواطنيها …
- وهي الدوله الوطنيه كده بس ؟
لا ياسيدي
دي النسخه القديمه اللي بقالها ٥٠٠ سنه تقريبا
لكن الابديت الجديد اللي طرأ عليها خلاها
وطنيه بلس +
ايه كمان البلس دي ؟
مفهوم الدوله الوطنيه مع العالم اللي فعلا بقي قريه صغيره … استن مفهوم مابيعجبش حد في دول منطقتنا اسمه
( المبادئ التي تحكم الدوله الوطنيه لاتسمح باجتراء المؤسسات او القوانين التفصيل علي المواطن - اي انسان في اي بلد
- علي مفاهيم اصبحت ابجديات زي حقوق الانسان والتفرقه بدعاوي مختلفه -وبالتالي لانهم اعتبروها mission استنوا بجوارها قوانين يونيفرسال وكل او اغلب الدول بصمت عليها وجعلت مخالفها عرضه لعقاب اممي وعقوبات تقطم الوسط …
- ده عرض سريع
واتوقع للي وصل هنا في القراءه انه اولا بطل وثانيا انه هايعمل بانوراما في تاريخ وطنه وسيجد ان ماجري عبر سنواته لم يكن سوي ( الترويج صعودا وهبوطا ) للدوله القطريه بكل بلاويها واختياراتها وعشان كده تلاقيها مع ولي امر فوق وآخر تحت لان الادوات وربما النوايا للاصلاح مش متوافره وطبعا لان الكوكويين واعوانهم مصرين علي ان نتواجد في القرون الوسطي ودايما حجتهم الجاهزه
( الامن والامان يامواطن ولا التجريب اللي مش مضمون )
وهو خيار ( اللاخيار ) …
كاتب المقال لواء مهندس متقاعد من ابطال حرب أكتوبر قوات الدفاع الجوى
.jpg)
