بعد تصوير فيلمه «البعبع» بها.. أمير كرارة: انبهرت بإمبابة واستغربت ليه ما زورتهاش لغاية دلوقتي

تحدث الفنان أمير كرارة، عن كواليس مشاركته في فيلم «البعبع»، الذي يُعرض بالسينمات خلال عيد الأضحى السينمائي.

وقال «كرارة»، في تصريحات تلفزيونية: "أول مرة أعمل عمل كوميدي، وفي الأول كنت مرعوب، والفيلم جه بطريقة مختلفة قابلت المؤلف ودماغه ذرية، وقعدنا أنا وهو، وحكا لي الفيلم كله وكنت بضحك وهو بيحكي، وهو دمه خفيف إيهاب، وقولتله الفيلم تحفة وهو بتاعي، وانشغلت سنة ونص، قعدنا أنا والمخرج حسين المنباوي، وبعتله الفيلم، قالي عايز الفيلم دا وهو مفهوش غلطة، وصورنا جزء كبير قبل رمضان، وباقي الفيلم بعده".

وأضاف: "وممكن أكون اتأخرت في السينما؛ بسبب إني كنت بـ أعمل سينمات، وأنا وبيتر ميمي وش السعد على بعض، ولما اشتغلنا كلبش كانت سلمة كبيرة في حياتنا، وكنت خايف من الكوميديا، بس كان معانا محمد عبد الرحمن توتا وأنور، وأخويا وحبيبي باسم سمرة، والعسل اللي بـ أموت فيها ياسمين صبري، وكان جوايا تحدي وعايز أعمل حاجه مختلفة".

وتابع أمير كرارة: "أنا أقرب حد لي في حياتي ولادي، هم بصحابهم كلهم أنا اللي مربيهم، وهما دول شلتي اللي بستمتع بيهم، ولما بنطلع الساحل بيرجعوا علشان يتمرنوا بقعد معاهم لوحدهم، وأنا بالنسبالهم بابا نويل، وأنا بتبسط معاهم، ولعبتي التعامل مع الأطفال".

واختتم أمير كرارة حديثه، بتوجيه تحية لأهالي إمبابة، قائلًا: "تحية كبيرة لإمبابة، روحنا صورنا اليوم دا هناك أنا أنبهرت، وباقول لهم إزاي ما جيتش هنا قبل كدا، حلاوة الناس وتعاونهم معانا، وكل الناس اللي كانت الموجودة في المشهد، وبيعملوا زي ما حسين المنباوي بيقولهم، وكلهم حقيقين، ولو روحتي شوفتي فيلم في البرازيل هتشوف نفس المكان اللي في إمبابة".