أمير كرارة: سوق الكانتو تقليد للمسلسل البريطاني «بيكي بلايندرز» ومشوا الدنيا

قال الفنان أمير كرارة، إن مسلسله «سوق الكانتو» الذي عرض ضمن ماراثون دراما رمضان 2023، مقتبسًا من المسلسل البريطاني «بيكي بلايندرز»، وذلك بعد الانتقادات التي تعرض لها صناع العمل.

وأضاف «كرارة»، في تصريحات تلفزيونية: "أول ما نزل البوستر اتقال بيقلدوا بيكي بلايندرز، اه احنا بنقلده، أنا صريح جدًا على فكرة، أنا كنت قاعد على الكرسي وحسين المنباوي جنبي وكان المسلسل شغال قلت له هموت واعمله".

وتابع: "ويا عم اه بنقلده إيه المشكلة لما نعمل حاجة شبهه ما فيه زمن بتاع البريهات والبالطوهات، مش كان فيه مصر ما تيجي نعمل الزمن دا، وعملنا حدوتة تانية خالص، وأنا حبيت أغير الشكل بشكل المسلسل بالحدوتة والزمن، فتلاقي اللبس والشوارع والديكور مختلف، وقلت لـ هاني سرحان نفسي أعمل حاجة شبه بيكي بلايندر".

واستطرد الفنان أمير كرارة: "زي فيلم البعبع، اتقال بيقلدوا فان ديزل، اشمعنى بره بقى له عشرين سنة بيطلع بالجينز والفانلة البيضة وهناك مكسر الدنيا".

واستكمل حديثه في هذا الشأن قائلًا: "مشوا الدنيا وما تحبكوهاش واتبسطوا احنا بنعمل حاجة لطيفة، ما هم بره بيقلدوا بردو، وفيلم مان فاير كسر العالم مع أنه هو هو الفيلم اللي عمله أميتاب باتشان من عشر سنين، أصل الحب واحد والكره واحد والأكشن واحد والكوميديا واحدة، هي تيمة وبنعملها بشكل مختلف، ما احنا شوفنا مسلسلات كتير لواحد ومراته حبوا بعض واتطلقوا".