حاولت أقتله 3 مرات ومعرفتش.. ماذا قال المتهم بالتخلص من رجل أعمال بالمقطم؟ (تحقيقات)

حصلت "النهار المصرية" على النص الكامل لاعترافات المتهم بقتل رجل أعمال في المرج بالاشتراك مع آخر؛ بسبب خلافات مالية بينهما، بعدما طلب المجني عليه منه رد 5 ملايين جنيه اقترضهم القاتل منه.

وأدلى المتهم "حمدان.إ"، باعترافات تفصيلية حول الواقعة، مؤكدًا أنه حاول إزهاق روح المجني عليه 3 مرات، إلا أنها بائت بالفشل، حتى نجح في إطلاق النيران عليه في المرة الرابعة.

وإلى نص التحقيقات:-

س/ ما تفصيلات اعترافاتك؟

ج/ اللي حصل أني أعرف المتهم الأول "محمود.ق"، من عشر سنوات تقريبًا عشان كنا جيران في الدويقة في منشية ناصر، ولما اتقابلنا قبل رمضان اللي فات، اتكلمنا وسألني عن ظروفي المادية، وبعدها اتقابلنا تاني وقاللي إن فيه واحد مضايق ناس كبيرة في الشغل ومعاه ورق ماسكه على الناس دي وفهمني أنه نفسه وسيط وطلب مني نهدده بالضرب عشان ناخد الورق بعدها فكر تاني وقاللي إننا ممكن نخلص عليه وساعتها عرض عليا 70 ألف جنيه وأنا ساعتها قولتله أنتوا بتتكلموا عن أوراق وفلوس بالملايين وقليل الفلوس دي، وساعتها قالي هديك 200 ألف جنيه، وبعدها بـ10 أيام قالي هديك 100 ألف جنيه وهنخدمك في حاجات تاني.

س/ وما الذي حدث في أعقاب ذلك؟

ج/ أنا وافقت وقاللي عاوزين سلاح وقلت له لو عاوز سلاح أجيبلك فقالي هتجيبه منين قلتله من أسيوط أعرف ناس بتبيع سلاح هناك، وساعتها اداني 30 ألف جنيه وقبل ما أسافر خدني ووراني بيت الشخص اللي ضربته بالنار وقالي إنه نقل في فيلا، وطلب مني أراقب تحركاته وفعلًا راقبناه ومشينا وراه 3 مرات، ومرة منهم رفضت أضربه عشان في الشارع وبيجري بالعربية.

س/ وكيف تخلصتم من المجني عليه؟

ج/ صاحبي اتفق معايا أنه هيستدرجه في الشقة بتاعته في المقطم واتقابلنا الساعة 8 في البيت وقالي أنزل وتعالى كمان ساعة أكون اتصلت بيه وجبته، وفعلا رجعتله تاني لما وساعتها فتحلي باب الشقة بالمفتاح ونزل واداني ورقة وقلم وقالي خد المقاسات بتاعة الشقة عشان تشطبها واداني الطبنجة وفعلا اخدت مقاسات الشقة، وبعد 10 دقايق لقيت الراجل داخل ومعاه كوباية شاي وكانوا بيشدوا في الكلام مع بعض بسبب الفلوس، وبعدها شاورلي بدماغه فطلعت السلاح من تحت البنطلون وشديت الأجزاء والراجل خد باله ولف وشه وضربته طلقة في جنبه الشمال وجالي انهيار وضربت طلقتين تانيين ومخدتش بالي جات فين وصاحبي كتم نفس المجني عليه بعد ما وقع وأنا رميت الطبنجة جوا الشوال وساعتها صاحبي قالي أهدى أنا معاك.

س/ وما الذي حدث في أعقاب ذلك؟

ج/ صاحبي أخد الشوال والطبنجة وأنا كنت خايف أنه يضربني وقالي أنا هنزل أشوف حد سمع ولا لأ وطلب مني أحط الجثة في شوال، وطلع بعدها سألني قلتله مش عارف احطه جوا الشوال، فنزل وجاب مشمع وفرش المشمع على أرض الصالة وطلعنا الجثة ولفيناها فيه وبعدها جبنا مشمع تاني وربنطاه بسلك وكسرنا الموبايل وقطعنا محفظته وحطيناها في الشيكارة، ونزلنا ركبنا العربية وصاحبي قاللي فكك أجزاء المسدس وارميها وأحنا ماشيين في الطريق، ورحنا نازلين عند أول المطلع بتاع الجامعة وساعتها شيلت المشمع ورميناه وجسمه اتدحرج على الجبل، وبعدها رجعنا تاني ومشينا وصاحبي طلب مني أرمي المشمع في الطريق وبعدها رمينا الشيكارة.

س/ وما الذي حدث عقب ذلك؟

ج/ بعدها محمود صاحبي روحني واداني 10 آلاف جنيه وبعدها قالي عدي عليا بكرا ولا بعده هديك باقي الـ90 ألف وبعدها رجعت تاني على الشركة واخدت عربية الراجل وديتها عند الجبل وقطمت المفتاح وروحت بيتنا.

س/ وهل من ثمة اتفاق جنائي دار بينك وبين المتهم الأول؟

ج/ هو الأول طلب مني أضربه من البلكونة اللي في الدور التالت وهو نازل من العربية وبعدين قاللي ممكن حد يشوفك وأنت بتضربه، وبعدها قالي هطلعهولك فوق في الشقة وتضربه فيها.