ماجدة خير الله تنتقد شريف منير: ابلع اللي في بقك وبعدين اتكلم لأن المنظر مقرف

وجهت الناقدة ماجدة خير الله انتقادات عنيفة لـ الفنان شريف منير وذلك بعد فيديو الذي نشره عبر حساباته الرسمية بموقع التواصل الاجتماعي للدفاع عن ابنته أسما شريف منير بعد تعرضها للانتقادات في الايام الماضية.

وكتبت ماجدة خير الله عبر حسابها الرسمي بموقع فيسبوك: أهالينا علمونا مانتكلمش وإحنا بناكل لإن المنظر بيبقي مقرف وبعيد عن اللياقة، إبلع اللي في بقك وبعدين قول اللي إنت عايزه، مش كده ولا إيه؟

شريف منير ورده على الهجوم على ابنته

وكان قد خرج شريف منير عبر حسابه بموقع انستجرام، وقال: مساء الخير، باكل سمك مشوي ورز أبيض، إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا إيه الغلط اللي هي عملته، تصرف عادي جدًا مفيهوش أي حاجة، إوعوا تفتكروا إني هاجي على بنتي عشان خاطر أكسب رضاكم.. دي بنتي اللي ماليش غيرها وبحبها، بالمناسبة اللوك اللي عملته عاجبني وأنا مبسوط منها أوي، بس قبل ما الإخوة السادة الملايكة الصالحين اللي عمالين يقلوا أدبهم ويشتموا، وبيقولوا تاخد التريند وجاتها البلاء في شكلها وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه، المهم إنها متكونش بتأذي حد.

وأضاف شريف منير: قبل ما تتكلموا بصوا على نفسكو واتفرجوا على عيلتكو وعلى إخواتكو وعلى الناس اللي حواليكو قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية، لا أنا بنتي متربية كويس جدًا.

شريف منير يأكل السمك أمام الجمهور

واستطرد: بحب آكل السمك والرز بإيدي حتى في المحلات الفخمة جدًا تفتكروا دي قلة أدب مني ولا مفيش إتيكيت؟ على العموم ريحو نفسكو واهدوا شوية؛ لإن اللي حصل من بنتي مش غلط ومش عيب هي مغلطتش في حد فيكو ومغلطتش في نفسها وبعدين بنتي عندها 36 سنة وأم وعندها بنوتة ومسئولة عن نفسها.. وأنا أب مسئول إني أحميها وهي حرة في تصرفاتها، أسما أنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها المهم إننا مش بنضر حد، سلام عليكم.