جوري بكر: كنت فاكرة عمرو دياب مش عارفني وزوجي فرح لما نده اسمي

أعربت الفنانة جوري بكر عن سعادتها الشديدة، عن تفاعل الفنان عمرو دياب، معها خلال حضورها حفله الغنائي في مدينة الغردقة، وكشفت عن كواليس مسلسلها جعفر العمدة.

وبحسب «جوري»، خلال تصريحات تلفزيونية: "تشرفت بالعمل مع فتوح كان عايش الشخصية في طريقة، وكان متقمص الدور جدًا، وكنت مخضوضة منه، ومش قادرة أقتنع إنه بنى آدم طبيعي، وكلنا كنا مبسوطين، وهو كان مصمم إنه إحنا نراجع المشاهد".

وأضافت: "محمد سامي المايسترو بتاع مسلسل جعفر العمدة، وأنا اتخضيت أول ما قرأت الورق، ولكن محمد سامي كان بيذاكر لي المشهد، وخلاني أثق في نفسي كممثلة".

وتابعت جوري بكر: "أحمد فهيم كان رهيب، علاقتي معاه في المسلسل حسينا إن إحنا سيد ووداد، وكان بيبقى مركز تركيز رهيب، وكان بيساعدني بشكل كبير في المسلسل أنا عيطت بسبب مشهد سيد، وطلبوا من محمد سامي مشهد يجيبوا وداد من شعرها، ولو سبهم كان هيبقى دمار شامل، وهيضربوني بجد، وفي مشهد منذر رياحنه شدني من شعري جامد، وأكتر حاجة قاسيه تعملها مع بنى آدم تكون بخيل بمشاعرك".

وبشأن تفاعل عمرو دياب معها وفريق عمل «جعفر العمدة»، أثناء حضورهم، حفله بالغردقة، قالت: "في وسط حشد كبير عمرو دياب كان بيسلم على هالة صدقي، واتكسفت وقولت أكيد مش عارفني، وبعد كده قال اسمي، واتبسطت جدا إن عمرو دياب اتفرج على المسلسل وقال اسمي، ولازم اشكر جوزي حبيبي وكان حاسس إن هو هينادي اسمي، ووداد كانت وحشة قوي"..