زينة: الفن مش عيب وكفاية إن ناس كتير بتدعي للممثل

كشفت الفنانة زينة، أنها عملت مذيعة لمدة 3 أشهر تقريبًا مُشيرة إلى رفض والديها دخولها مجال التمثيل.

وبحسب «زينة» خلال تصريحات تلفزيونية : "اشتغلت مذيعة شهرين أو تلاتة شهور بناء على رغبة والدتي، لأن فكرة المذيعة هلبس بدل حلوة وشيك ولذيذة، ومامتي كانت رافضة نهائي أني أشتغل ممثلة وضغطت عليا لحد ما شيلت جوايا وانفجرت".

وأضافت: "لما بـ ألاقي حد من صحابي ولادهم عاوزين يمثلوا وهما مش عاوزين بقول لهم سيبوهم دلوقتي يعملوا التجربة بجد علشان ما تفضلش جواهم وعاوزين يحققوها لما يكبروا، سيبوهم هيزهقوا ويتعبوا ويطلعوا الطاقة اللي جواهم وممكن ينجحوا لأن الفن شغلانة كويسة جدا ومش عيب، واللي بيقولوا كدا هما نفسهم بيتفرجوا علينا وبيجروا يتصوروا معانا".

وتابعت زينة: "أنا شفت جنازات الفنانين الجمهور العادي بيمشوا فيها، وكفاية أن لو أسرة مات فيها حد الحد دا يدعوا له الأسرة فقط لكن لو فنان ناس بتحبه هتلاقي ناس كتير بتدعي له، خاصة لو فنان متفاني في عمله، لأن فيه طفرات من الفنانين زي فنان يكون مصدق قوي وبيعمل حبه بصدق وتفاني ومش بياخد غير حب الناس".