بالفيديو.. «أديب» عن «الدعوات لثورة جديدة»

أعرب الإعلامى عمرو أديب ، عن استياءه الشديد من انتشار دعوات على مواقع التواصل الإجتماعى، تدعو للقيام بثورة جديدة، قائلاً: «هو البلد ليه بتتلكك؟، ليه كل حاجة فردية بتحصل غلط، نلجأ للميدان، مفيش طريقة تانية نتكلم بيها غير نعمل ثورة !؟، هو الشعب ده يعمل ثورة يوم أه ويوم لأ، وبعدين وصلنا لإيه من الثورات دى، ما الحالة زى الزفت وأنيل منه كمان، بنتدهور في حالة مش طبيعية، ويادوبك بنبتدي نشم نفسنا تانى».

وأضاف «أديب»،خلال برنامجه «القاهرة اليوم»، على فضائية «اليوم»، مساء الأحد: قائلاُ: «إيه حالة الفوبيا اللى بقيت عند الناس من ثورة يناير دى، وبعدين اشمعنى 25 يناير بالتحديد، هو ده العيد القومى للثورة ؟، مفيش بلد في العالم بيحصلها اللى بيحصلنا، هو مش ممكن يعنى نستنى ونعمل الثورة السنة الجاية !؟، هنولع فيها مع بعض أوعدكم بس السنة الجاية، الثورات جاية كتير والله، بس فكرة إن الثورة لازم دلوقتى دى مسألة غريبة جداً، وعلى رأى الإخوان الثورة في البرلمان مش في الميدان».