تامر أمين: ظهوري مع باسم يوسف تهذيب لنفسي

قال الإعلامي تامر أمين، إن سبب ظهوره مع الإعلامي باسم يوسف وفريق عمل برنامج «البرنامج»، رغبة منه في تربية وتهذيب نفسه، وكسر حاجز الغضب والتراشق المتبادل بين الإعلاميين وباسم يوسف، وإرساء مبدأ تقبل الانتقادات.

وأضاف تامر أمين في برنامجه الجديد «من الآخر» على فضائية «روتانا مصرية»، : «روحت برنامج باسم يوسف وعملنا كليب فكاهي ساخر وعملنا فيه حفلة تأبين للفيست بتاعي اللى كان العلامة المميزة للبرنامج بتاعي (ساعة مصرية)، فيه ناس مبسوطة جدا من الحركة وردود الأفعال جيدة جدا على مواقع التواصل الاجتماعي، فيه ناس مبسوطين وآخرين مضايقين وده بناء على حب أو كراهية باسم يوسف، المبسوطين شافوا إن دي حاجة تحسب ليا وليه، وآخرون تضايقوا بسبب حلقاته الأخيرة ومواقفه من الجيش».

وأوضح أنه حاول بذلك أن يهذب نفسه على فكرة تقبل الآخر وانتقاداته، «فلما يدعوني كان لازم أروح، وطالما اترضيت أبقى شخصية عامة يبقى لازم أتقبل النقد، أنا مش عاوو أبقى ملاك أو مثالي زيادة عن اللزوم، كنت عاوز أكسر حاجز الغضب والصمت والتراشق بين الإعلاميين، باسم يتريق على مذيع فالمذيع يطلع يرد عليه، يبقى تلاسن وتراشق».

وتابع: «مفيش مشكلة إن نسخر وننتقد بس نحترم بعض.. خلوا الاحترام والحب هوة اللي يسود ونخلص من حالة الكراهية بين الناس والسياسيين».