مجدي عبد الغني: الكورة بقيت سبوبة.. وموديست وسافيو لاعيبة مضروبة

أوضح الكابتن مجدي عبد الغني لاعب النادي الأهلي السابق رأيه في عدد من الصفقات التي أنجزتها القلعة الحمراء خلال الفترة الماضي منها صفقة اللاعب أشرف بن شرقي وصفقة إمام عاشور.

وقال مجدي خلال لقائه مع الإعلامية إنجي هشام في برنامج أوضة ضلمة المذاع على شاشة قناة هي: صفقة إمام عاشور مفيدة للأهلي جدًا وهو نجم كبير، وصفقة بن شرقي دوخت الزملكاوية وعملتلهم عدم اتزان، بدليل إن الأهلي أول ما جاب بن شرقي هما اتعادلوا في أول ماتش ومكنوش متخيلين إن بن شرقي اللي لعب لسنين طويلة في الزمالك يروح الأهلي.

كما عبّر مجدي عن رأيه في صفقات اللاعيبة التي تتخطى 100 مليون جنيه، مضيفًا: بقينا نسمع أرقام غريبة جدًا لا تصلح لكرة القدم المصرية؛ لأن أنديتنا علابة مش أغنياء ومفيش دخل، اللاعيبة لا تستحق المبالغ الضحمة دي لا في النادي الأهلي ولا الزمالك ولا حتى الصفقات الأجنبية، بدليل إن المغرب وتونس مش بتجيب لاعيب بالأرقام دي مهما كانت شطارتهم.

وأردف: دلوقتي الأندية عايزين يرضوا جماهيريهم وخلاص، واللي بيحصل في النادي الأهلي من ديون دي إدارة عبارة عن إدارة مكنتش عارفة بتعمل إيه، والميزة في النادي الأهلي إنه محدش بيسمع عنه حاجة ولما بيجيب لاعيبة مضروبة بيخلصوا الموضوع في هدوء، زي صفقة سافيو وميكيسوني وموديست، كل دول لاعيبة مضروبة.

واستكمل حديثه، قائلًا: الكورة دلوقتي بقيت سبوبة كبيرة جدًا، وفيه ناس مكنتش تحلم تعدي من قدام نادي بقوا مليونيرات وراكبين عربيان بـ 12 مليون ومكنوش لاقيين ياكلوا قبل كده.

الجدير بالذكر أن برنامج أوضة ضلمة يذاع يوميًا على شاشة قناة هي، وتقدمه الإعلامية إنجي هشام، في تمام الساعة الثامنة مساءً.