ياسمين عبد العزيز: كانت أمنيتى إنى أبقى ظابط لكن مانفعش

صرحت الفنانة ياسمين عبد العزيز أثناء حلولها ضيفة على برنامج صاحبة السعادة مع إسعاد يونس على شاشة قناة dmc، أنها لم تكن تحلم بالتمثيل في سن صغيرة، بقولها: "ما كنتش عايزة أبقى ممثلة ولا بحلم بكده، كان حلمي في البداية إني أبقى ظابط، وده من أسباب إنى عملت فيلم أبو شنب من كتر ما كان نفسى وحلمي أبقى ظابط بنت، ولكن ما نفعش رغم إنى سألت وقتها".

وتابعت ياسمين عبد العزيز: "كمان كان من أحلامى أبقى مخرجة إعلانات زي طارق نور من كتر ما كنت مبهورة بيه وأنا بعمل الإعلانات".

كما كشفت أيضا ياسمين عبد العزيز خلال اللقاء أنها كانت أغلى موديل للإعلانات وقت تقديمها لها، رغم سنها الصغيرة وقالت: "أنا كنت اللى بصرف على نفسى في الدراسة، وجبت لنفسى عربية وشقة في سن 16 عام فقط، وده أمر إيجابى لأنى كنت مسئولة عن اللى حواليا، وعمري ما عملت بالفلوس الكتير اللى كانت بتجيلي حاجة غلط".

وأضافت ياسمين، خلال حلولها ضيفة فى برنامج "صاحبة السعادة": "أنا اتعودت إنى أدى بس، ما أخدش خالص حاجة من حد".