ياسمين عبد العزيز: ولادى مش بيحبوا فيلم الدادة دودى نهائي

صرحت النجمة ياسمين عبد العزيز خلال استضافتها ببرنامج صاحبة السعادة مع الفنانة والإعلامية إسعاد يونس على شاشة DMC، عن علاقتها بأبنائها بقولها: "بنتي صاحبتى بصورة كبيرة، ورغم إن الأطفال بيعشقوا فيلم الدادة دودى، ولكن الاتنين مش بيحبوا الفيلم ده، لسبب إن العيال في مشاهد كتير بيضربونى ويعملوا فيا مقالب، وبالتالي مش بيحبوا يتفرجوا على الفيلم ده نهائي".

وعن والديها وعن بدايتها في الإعلانات قالت ياسمين عبد العزيز: "والدى ووالدتى كانوا منفصلين من وأنا عندى 9 سنين، ولما دخلت الإعلانات كان عندى هدف إنى أكون مسؤولة عن نفسى وإنى أكسب فلوس".

وتابعت ياسمين عبد العزيز: "كنت مركزة في راسى إنى عاوزة أبقى حاجة ويكون معايا فلوس وناجحة، ولما دخلت في شغل الإعلانات وأنا عندى 12 سنة، امى كانت بتيجى معايا التصوير، وأنا اللى كنت بأتفق على كل حاجة وعلى الفلوس، وأنا اللى بقول هعمل إعلان إيه بالظبط".

وعن بدايتها في الإعلانات قائلة: "بدأت الإعلانات وكان عندى 12 سنة، وكنت بحب أتفرج على الإعلانات وأتفرج على البنات وكنت أقعد أقلدهم وأعمل زيهم، ودايما في حاجة لما يكون نفسك في حاجة بتخيل نفسى في الحاجة اللى عوزاها".

هذا وحلت الفنانه ياسمين عبد العزيز، ضيفة في برنامج "صاحبة السعادة" المذاع على قناة Dmc، الذي تقدمه الفنانة والإعلامية إسعاد يونس، وبسؤالها عن هل ممكن تتزوج مرة أخرى قالت ياسمين عبد العزيز: "أنا عامة طول عمرى متجوزة وعمرى ما كنت سينجل، واللى طول عمره متجوز ما بيعرفش يكون لوحده".