مجد القاسم: مي كساب اكتشافي وتعبت علشان تبقى نجمة.. وبنصحها ترجع للغناء تاني

كشف الفنان السوري مجد القاسم، تفاصيل أغنيته الشهيرة غمض عنيك، والتي تعاون خلالها مع الفنانة مي كساب، مؤكدًا أنه أول من اكتشف موهبة كساب.

وقال مجد القاسم في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": أغنية غمض عينيك مكنتش أغنية دويتو، كانت سينجل ولما سمعت الأغنية كانت اختيارتي حذرة جدًا وقولت عايزة أعملها دويتو لأن كان منتشر وقتها الأغاني الدويتو الإيقاعية وناجحة، وقولت نعمل أغنية دويتو بين حبيبن ويرقصوا عليها سلو.

وتابع: وبدأنا ندور على المطربة وتقريبًا سمعت 100 صوت وفيها أصوات هائلة ولكن مكنش الصوت اللي بدور عليه، لأني كنت بدور على صوت فيروزي ونجاة، لغاية ما الأستاذ أسامة صبري قالي أنا عندي طالبة وسمعتها وحسيت أن البنت دي راكبة على الأغنية وقولتلها مبروك عليكي، والشركة كانوا اتفقوا على نجمتين وقالوا لازم نجمة ونجم قولتلهم أنا هجيب صوت ماحدش يعرفه عشان عارف الأغنية دي رايحة فين، ولما جت مي الاستوديو وغنت كله صقف لها.

وأضاف: نزل الألبوم وكسر الدنيا، وكنا هنصور أغنية أسمع بقى وعملنا ورشة ومدير التصوير والمخرج، وكنا نازلين ناكل وكان في طلبة كتير ومصدقوش وجريوا عليا وبقوا يسألوني مش هتصور غمض عنيك؟ مدير التصوير سألني إيه أغنية غمض عنيك؟ قولتله دي أغنية دويتو في الألبوم، وقالي هنصور الأغنية دي، واتصلت بـ مي كساب وتاني يوم كنا بنصور في الفيوم.

أما عن رأيه في اتجاه الفنانة مي كساب إلى التمثيل، فعلق مجد القاسم: مي كساب لاقت نفسها في التمثيل، وفرصتها في التمثيل كانت أكبر وهي بقت نجمة وكافحت كتير وتعبت علشان تبقى نجمة، وأنا بنصحها ترجع للغناء لأن صوتها منفرد.