تامر حبيب بعد عرض فيلمه «حب البنات» بالسينما: راجع من الفيلم طاير من الفرحة

أعرب السيناريست تامر حبيب عن سعادته البالغة بإعادة عرض فيلم ( حب البنات ) ، في سينما زاوية بمناسبة عيد الحب ، حيث أن صالة العرض أمتلئت بالشباب الذي دخل معهم في حوار عقب أنتهاء الفيلم .

وكتب تامر حبيب عبر حسابه الرسمي بموقع تبادل الصور والفيديوهات ( إنستجرام ) : كانوا عاملين عرض لفيلم ( حب البنات ) بمناسبة عيد الحب ومشكورين جدا طلبوا مني أروح أحضر الفيلم وعملولي لقاء مع الجمهور بعد ما الفيلم خلص ….والجمهور اللي كان مالي كل كراسي القاعة ومفيش كرسي فاضي كانت طبعا أغلبيتهم العظمي من البنات ويمكن 90% منهم كانوا أطفال أو لسه متولدوش لما الفيلم أتعرض في 2004.

وقال تامر حبيب : أنا راجع من الفيلم طاير من الفرحة والسعادة والبهجة وحاسس بنشوة لاتضاهيها نشوة … الشباب كانوا بيسمعوا الحوار مع الفيلم وهو شغال … وكانوا بيصفقوا مع ظهور الممثلين كأنه عرض مسرح … وبيغنوا ويرقصوا مع كل كلمة في كل أغنية في الفيلم … وفاجئوني بتصفيق مدوي بعد ما الفيلم خلص كأنهم كانوا في مسرحية لعادل إمام .

وأضاف : مهما وصفت مش هقدر أعبر عن شعوري اللي حسيته من أول ما الفيلم بدأ لحد دلوقتي حالا …. وروح وطاقة وبهجة الشباب وهما بيحاوروني بعد الفيلم كانوا مخليني عايز أسجد شكر لربنا علي أنه أنعم عليا بأحساس محستهوش من زمان ، أنا كنت قاعد وسط مجموعة من الشباب فاتحين عليا هويس حب وبهجة بجد ما تتوصفش .

واختتم تامر حبيب حديثه ، قائلا : شكرا لكل واحد وواحدة خلوني أحس بسيل المشاعر ده ، وشكرا لصاحبة فكرة عرض الفيلم مع أسرة سينما زاوية ، وفي عيد الحب بعد عشرين سنة من عرضه ، وشكرا يا سينما إنك عندك كل هذا السحر ، وشكرا يا أمي علي كل دعائك ليا ربنا يحبب فيا خلقه ، وأحب أطمنك يا ماما أن ربنا أستجاب لك من وسع … وألف شكر وحمد ليك يارب .

فيلم ( حب البنات ) بطولة ليلي علوي ، خالد أبو النجا ، حنان ترك ، أحمد عز ، هنا شيحة ، أشرف عبدالباقي ، إخراج خالد الحجر ، تأليف نهاد عبدالعزيز .