سارة التونسي ترد علي جمال العدل رد ناري: عندي كلام كتير وخطير

ردت الفنانة التونسية سارة التونسي، على تصريحات المنتج جمال العدل، الذي اتهمها بالتمرد على شركة العدل جروب، وتسببها في مشاكل أثناء تصوير أحد الأعمال الفنية الخاصة بالشركة.

وقالت سارة التونسي، في منشور لها على صفحتها على موقع التواصل الاجتماعي "فيس بوك": "أستاذ جمال العدل، أنا ماكنتش عارفه إني مضايقة حضرتك أوي كده، خصوصاً بعد ما أنا كسبت القضية ضد شركة العدل جروب، وحضرتك خسرت قضيتك ضدي".

وأضافت: "بس ياااااه.. أنت لسه فاكر؟، ده عدى على الموضوع ده أكتر من سنتين، وأنا والله نسيت الموضوع، بس دي "والله" بجد مش زي بتاعتك)، واشتغلت في بلدي وكسّرت الدنيا، ولو عايزه أشتغل في مصر؛ هشتغل، أصل مصر دي كبيرة أوي يعني، أكبر من حضرتك ومن أي حد، ولا إيه يا أستاذ جمال؟، مش أنت اسمك كده برضو؟، والله عيب على سنّك وتاريخك كمية الكذب اللي أنت كاذبها بخصوصي في اللقاء ده (بس مش تاريخك كله يعني)".

وتابعت: "وكمان حركة إنك نسيت الاسم دي؛ تقلّل منك مش مني، بلاش أقولك شكلك كان عامل ازاي وأنت بتحلف إنك نسيت الاسم، عملتها قبل كده في إعلام بلدي تونس، واترد عليك رد عظيم من المذيعة التونسية اللي كانت بتحاور حضرتك".

وقالت أيضاً: "وعلى فكرة، أنا ماطلعتش بره مصر، أنا عندي بيت في مصر بزوره كل شهر تقريبًا، وبختار أشتغل إيه وماشتغلش إيه، وأنا اخترت أركز في تونس، وعملت بطولة مسلسل تونسي كسّر الدنيا السنة إلى فاتت، والإعلام العربي كلّه اتكلّم عنه، ويمكن عشان كده حضرتك افتكرتني تاني فجأة (ده لو كنت أصلا عرفت تنسى الدّرس)، وإن شاء الله هيكسّر الدنيا في الجزء التاني السنة دي".

وأوضحت: "أنا أكبر من إني أشتغل أي عمل وخلاص؛ عشان بس أقول أنا موجودة، وده من زمان، وأنت عارف ده كويس، واتكلمنا فيه لمّا حضرتك طلبت تقابلني في مكتبك؛ عشان كنت عايز تمضي معايا عقد بـ 3 سنين، بعد ما نجحت في دور شيرين في مسلسل "بـ 100 وش"، بأمارة ما قلتلي: "أنا محتاج روح جديدة ودم جديد؛ عشان اللي عندي في الشركة كبروا خلاص"، وقلت كلام تاني كتير عنهم في غيابهم، وللا نسيت دي كمان؟، ويومها أنا قلت لنفسي: اللي يتكلم كده عن ناس اشتغلوا معاه سنين؛ يخوّف، ورفضت أمضي مع حضرتك العقد ده يا أستاذ يا اللي ناسي اسمي".

وأكدت: "عندي كلام كتير وخطير ممكن أقوله بخصوص حضرتك، وبخصوص إلى أنت قولته في برنامج حبر سري، بس للأسف، عندي تصوير ومش فاضية، وكمان حزني على اللي بيحصل في العالم؛ مخليني مستهيفة كل الحاجات دي".

واختتمت منشورها: "شكرًا لكل متابعيني اللي بعتولي الفيديو، أصلي أكيد مش متابعة، ومفيش سبب يخليني أتابع حلقة بتستضيف شخص أنا أعرف عنه كتير، بس اخترت أسكت وماطلعش في الإعلام، وأخلي القضاء يقول كلمته، وقالها الحمد لله، حضرتك ولا اتعظت من عقاب ربنا وقتها، بإن كل استديوهات ومخازن العدل جروب اتحرقت، ولا اتعظت من إنك خسرت القضية، وأنا اللي كسبت الحمد لله، ولا اتعظت من اللي بيحصل الأيام دي.. مش عارفه أقولك إيه، والله وبصراحة ولا عندي وقت أقول أصلا، كفاية عليك المشاكل اللي حضرتك عاملها مع نص ممثلين مصر".