طبيب أسنان يكشف الطريقة الصحيحة لاستخدام الفرشاة والمعجون

كشف الدكتور إسلام سعد، زخصائي طب وجراحة الفم والأسنان وتجميل الأسنان، عن الطريقة الصحيحه والعملية لاستخدام الفرشاة والمعجون.

قال الدكتور إسلام: "فرشاة الأسنان مهمة جدا ولازم طبعا نستخدمها بشكل مستمر، طبعا هناك فرس سوفت اللي بتكون طريه، وفيه الميديم اللي بتكون وسط، وفيه اللي بتكون هارد بتكون ناشفه، نوع الفرشاة اللي احنا بنستخدمها بتختلف من حالة إلى أخرى، وفيه الفرشاة الكهربائيه دي بتكون ممتازه جدا بتعمل تفريش للاسنان بطريقه معينه أو ميكانزم معين او لو المريض مش بيعرف يغسل اسنانه".

وأضاف، صانع الأبتسامة، أن "لازم طبعا المريض يتعلم الطريقة الصحيحة لغسل الأسنان، مش بنغسل بالعرض لأنه بيخلي اللثه يحصل فيها تآكل مع الوقت، فده طبعا غلط جدا، احنا بنقسم الفك بتاعنا لأربع جهات بنقسمه بالنص، فيه الطول الاول هيبقي عندنا نص شمال ونص يمين، ونص اليمين هيتغسل لوحده ونص الشمال لوحده، وتحت نص اليمين لوحده ونص الشمال لوحده، وطريقه الغسيل الصحيحه بتكون من بدايه اللثه لأخر حته في السنه، ولو احنا بنغسل الأسنان اللي فوق هنغسل من فوق لتحت، انما لو تحت هيكون من تحت لفوق، وكل جزء لوحده حوالي دقيقتين غسيل علشان نتأكد ان بواقي الطعام اللي بين الاسنان شيلناها طبعا".

وأشار إلى "حاجه مهمه جدا ان احنا بعد الغسيل نستخدم الخيط الطبي علشان لو فيه اي بواقي الفرشاة ماقدرتش توصلها، فالخيط الطبي يشيل بواقي الاكل دي، وطبعا ده الطبيب هو اللي بيحدد الفرشاة اللي يستخدمها المريض لان ممكن يكون ضار بأسنانك، والغسيل حاجه مهمه جدا ولازم مانهملش فيها ابدا".