يسرا عن مسلسل «1000 حمد الله ع السلامة»: من حقي أغير جلدي وكان نفسي أضحك الناس

تحدثت الفنانة يسرا عن مسلسلها «1000 حمدالله على السلامة»، والذي خاض ماراثون دراما رمضان، وقدم يسرا في شكل جديد غير الذي اعتادها عليه الجمهور.

وبحسب يسرا، في تصريحات تلفزيونية: "أنا ما كنتش عايزة أعمل أي حاجة غير إني أرسم البسمة على وشوش الناس، ودا اللي أنا قُلته لأستاذ جمال العدل، حبيت أعمل حالة حلوة للناس كلنا محتاجين ضحك وفرفشة، وأنا كنت محتاجة أعمل دا عشان أغيّر من جلدي:.

وتابعت: "أنا حقي كفنانة وممثلة إني أغير من جلدي ومقعدش في قالب واحد وأنجح في أي توب ألبسه، ده في حد ذاته تحدي كبير جدًا ليا، إحنا جبنا 100 مليون على التيك توك وعمري ما تخيلت ده في حياتي، وإننا نوصل لرقم قياسي زي ده عمرها ما حصلت، وقدرت أوصل لكل الناس".

وبشأن مشاركة الممثلين الشباب في أعمالها، قالت: "أنا فرحانة بيهم جدًا الشباب موهوب جدًا، وأنا مكنتش أعرف عنبة قبل ما نشتغل ولكن أنا فرحانة بيه جدًا وعنده قبول غير عادي ويدخل القلب، وآدم الشرقاوي أنا بعشقه من وقت مسلسل لعبة نيوتن وكنت هتجنن عايزاه معايا في مسلسلي، ومايان السيد موهوبة جدًا وبتمسك الشخصية صح، وأحمد عبد الوهاب ده من ورا العقل وعنده حضور غير عادي".

واختتمت يسرا حديثها، قائلة: "أتذكر إن عمري ما بطلت أدفع بالنجوم الشباب من يوم ما بدأت، بداية من مسلسل أين قلبي قدمت منة شلبي ومي عز الدين، ومسلسل ملك روحي قدمت أحمد عز، وطبيعة المهنة أجيال بتشيل أجيال، وحقهم عليا إني أديهم فرصة يستحقوها".

يُشار إلى أن مسلسل1000 حمد الله ع السلامة، يشارك في بطولة العديد من الفنانين مع يسرا، منهم: آدم الشرقاوي، مايان السيد، محمد ثروت، شيماء سيف، عنبة، سما إبراهيم، محمد أوتاكا، والمسلسل من تأليف محمد ذو الفقار، وتحت قيادة المخرج عمرو صلاح، وإنتاج جمال العدل.