جيانا فاروق تستعيد ذكريات الأولمبياد: الميدالية البرونزية الأغلى فى مشوارى

استعادت البطلة المصرية جيانا فاروق، لاعبة النادى الأهلى للكاراتيه، ذكريات تتويجها بالميدالية البرونزية فى أولمبياد طوكيو الماضية، ونشرت جيانا صورة من تتويجها بالبرونزية وعلقت: "الصورة دى من أغلى الصور بالنسبة ليا لأن فيها إحساسين مختلفين وعكس بعض، الإحساس الأول وهو الإحساس بالظلم اللى اتعرضت له فى الماتش وأدى إلى إنى مالعبتش ماتش الفينال وحصولى على البرونزية، وطبعا كل الناس اللى تابعت الماتش شافت اللى حصل وبشكر أى حد تعاطف معايا وجبر بخاطرى".

وأضافت بطلة الكاراتية: "والإحساس التانى وهو الرضا بقضاء ربنا وقدره وإن ده نصيبى اللى مكتوبلى وإنه الخير ليا.. أنا ساعتها قررت إنى اختار الإحساس التانى وإنى أفرح بالإنجاز التاريخى اللى حققته وإنى أول ميدالية أولمبية فى تاريخ الكاراتية المصرى للسيدات".

وواصلت: "ربنا كبير وعمره ما بيضيع تعب حد ودايما كاتب لنا الخير.. وفكرة إن ربنا رضانى بميدالية بعد كم الضغط النفسى اللى اتعرضتله ده فى حد ذاته كرم.. ارضوا بالنصيب والقدر واشكروا دايما ربنا عليه، شكرا يا رب على كل حاجة حلوة فى حياتى...شكرا يا رب على كرمك ونعمك اللى مغرقنى بيها...وهتفضل الميدالية دى اغلى ميدالية فى مشوارى الرياضى".