صحفي ينشر شهادته عن اعتصام رابعة الإخواني
نشر الكاتب الصحفي أحمد صوان شهادته عن فض اعتصام رابعة بالتفصيل الدقيق بالتزامن مع عرض مسلسل الاختيار2 باعتباره أحد سكان المناطق المحيطة بالميدان.
وقال صوان في شهادته: ناس كتير عارفة إن حتى سنة 2014 كنت ساكن في عمارات الضباط عند نادي السكة الحديد، محطتين من رابعة يعني، وكنا احنا الدائرة الأوسع لقرف الإخوان لأهالي مدينة نصر، أيوة كان اعتصام معفن لدرجة إني لو عديت ناحيته بالعربية كان لازم اقفل الإزاز لأن الريحة لا تُطاق. عرفنا بعد كده إن السبب مش بس قلة نظافة ولكن فيه ناس ماتت قبل الفض وكدسوا جثثهم لاستخدامها وتصوير إنهم قتلى الفض السلميين.
وأضاف : أيوة كانوا بلطجية وبيقتحموا الشقق ويهددوا أصحابها ويعتدوا عليهم أزيدك من الشعر بيت..المرحوم الشهيد النقيب شادي كان جاري لمدة 14 سنة، أنا كنت في الدور الثاني وهو في الرابع. طول عمره راجل محترم ولطيف، ومحدش منا شاف صوته بيعلى حتى لو بهزار أو حتى ضايق البواب بكلمة رغم إنه كان معصّب العمارة كلها!، لما طلعنا نعزي والدي شادي بعد ما عرفنا الخبر سمعنا من والدته إنه كلمها وقت الفض يبشرها إنه قبض على البلتاجي وصفوت حجازي. بعدها بساعتين حد من قيادات الداخلية اتصل بوالده - وهو كمان ضابط متقاعد- وقال له إن شادي وحد من زملاؤه استشهدوا بسبب خيانة ما، وحلقة الاختيار عرفتني السبب لأول مرة.
واختتم شهادته قائلا: ملحوظة أخيرة.. لي في ذمة إخوان رابعة ثمن المراية اليمين والزجاج الأمامي لعربيتي اللي دمروه فلولهم ساعة الفرار.. ولسه لحد دلوقتي بترحم على عسكري أمن مركزي أخد يومها طلقة في صدره مكاني واتوفى في الحال.