بالوعى والإلتزام نهزم كورونا 

كتبت : أميرة حسن

قلنا ، ونقول ، وسنقول ... محنتنا مش هتعدى غير بالوعى والالتزام ..وعى بمسئوليتك تجاه أسرتك ، و أهلك وبلدك..و التزام بقرارات واجراءات حكومتك

هو ينفع اللى كان طول الوقت يصرخ و ينوح تعبان فى الشغل..تعبان مواصلات..زهقت طوابير ..زهقت عوادم سيارات .. أول ما الحكومة تقولك سلامة البلد وسلامتك وسلامة أهلك تستريح فى البيت وتريح فيعاند و يرفض الراحة

طب ماتيجى نهدى ونرتاح شويه من صخب الحياه

واهى ياسيدى الفرصه جاتلك والحكومه بتقولك اقعد فى بيتك

وأول مره يكون كل اللى مطلوب منك أنك تلزم بيتك...طب ايه اللى بنشوفه..يا أهبل اسكندرية يا أهلى و ناسى بلاش نبقى شريك مخالف ... الإلتزام حلو لنا و للبلد حتى تمر الأزمة على خير

لا تكررى الأخطاء خروج عالكورنيش والشواطئ وخروج فالجناين..طب ليه ؟! هو احنا لازم نتأذى فى عزيز لينا..هو احنا لازم نتوجع..وطبعا بعد اللى اتنشر من صور وشفناه بعنينا كان لازم تدخل فورى من المحافظه ..محافظ الإسكندرية الاسكندريه مشكورا اتخذ قرار لمصلحه المحافظه قرر غلق الشواطئ..بس المفاجأه خروج بعض أهالى المدينة لحديقه المنتزه هو دا يصح ؟

هى لعبة استغماية مثلاً ؟

وبصفتى مقيمه داخل مدينه اعتقد نسبه الوعى فيها المفروض عالية حبتين..بصراحه قلقت وحسيت أن فى غموض فتحركات البعض...

وزى مافى ناس بتحرك ناس لغرض الله وحده قادر ينجينا منه

فى برضو ناس كتير رفضت دعوات الخروج من المنازل والتزمت

ارجوكم المرة دى الأزمه والمحنه تخص الجميع..الغنى والفقي ..المتعلم والجاهل..الكبير والصغير

...دورنا كبير والمسؤليه اكبر

فى ناس كتير شغاله بكامل طاقتها وجهدها..اطباء فالحجر وصيادله و جيش و شرطه..كله بيحارب وعلى قلب رجل واحد

تعالوا نعمل اللى علينا علشان ترجع تانى حياتنا وشغلنا وصلواتنا ..مش عاوزين محنتنا تطول ..الفرصه دلوقت معانا و فايدينا .. الأمل كبير نعدى الأزمة ..ومش حنعدى غير بقرار من كل فرد يلتزم ثقتى فىالله عظيمة و ثقتى فيكم كبيرة

الحل فى البيت ...خلينا كلنا فى البيت .. من أجل بلدنا ونفسنا و أهلنا و أحبابنا