كريم شحاتة:"مرتضى منصور حوليه ناس بتوقعه..ومش عايز أتكلم أكتر من كده"

أعرب الإعلامى كريم حسن شحاتة، عن دهشته من الأمور التى تحدث داخل نادى الزمالك، والتغييرات المستمرة للأجهزة الفنية، مؤكداً أن هناك بعض المحيطين بمرتضى منصور رئيس النادى يضللونه برأيهم من أجل مصلحتهم الشخصية.

وقال كريم حسن شحاتة خلال تقديم برنامجه "كورة كل يوم" عبر شاشة "النهار اليوم"، "فى ناس حولين مرتضى بتوقعه، لأنه بيسمع برأى اللى حواليه، وفى ناس مش بتحبه، والمهم أنهم يبقوا موجودين فى الزمالك، ومش همهم مصلحة النادى أو المصلحة العامة، وبيقبلوا بأى وضع وفى أى منصب، لأنهم متأكدين أنهم لو طلعوا برا الزمالك مش هيلاقوا مكان يشتغلوا فيه، والناس دى بتأثر على قرارات مرتضى، وعندى كلام كتير بس مش هتكلم علشان مصلحة النادى".

وأضاف كريم شحاتة، متسائلاً "جبنا ليه ماكليش ودلوقتى عايزين نمشيه، وليه حرقنا ميدو وحازم إمام بالشكل ده، وباكيتا مشى ليه؟..شاطرين بس لما نجيب حد نفضل نقول جايبين واحد عالمى..أنا بحمد ربنا أن المسئولين فى الزمالك مش بيتدخلوا فى الألعاب الأخرى، وده سر نجاحها، وما يحدث فى كرة القدم شىء لم أراه فى حياتى من قبل".