السيسى :قواتنا فى سيناء 1% من الجيش

علق الرئيس عبد الفتاح السيسى على مطامع الإرهابيين فى سيناء، بالقول: "بيقولوا بالقوة هنستطيع نحقق.. وأنا بقول لهم إن شاء الله لا يمكن حد يستطيع أن يفرض على المصريين حاجة هم مش عايزينها، لا يمكن فى وجود الجيش المصرى حد يقدر يوصل للمصريين". وأضاف الرئيس فى كلمته، للشعب المصرى من شمال سيناء، أثناء تفقده لقوات الجيش والشرطة هناك اليوم، السبت: "حجم القوات اللى موجود فى سيناء 1% من جيش مصر، والقوات الجوية اللى بتتدخل وتدعم عمل القوات ده برضو 1%..الجيش قادر على عمل قد اللى حصل ده الف مرة، ينهيه ويصفيه". وأشار الرئيس إلى أن "التفجيرات أعلم أنها لا تشكل بالنسبة لكم حدث كبير أوى، وهيتم تصفيتهم، وعلى آخر النهار تم فعلاً التعامل مع الهجمات والتخطيط ده بالشكل المخطط والمنظم". وتابع الرئيس: "صحيح سقط مننا شهداء وكمان مصابين لكن دى المهمة الوطنية والشريفة والمخلصة اللى بيقوم بها الجيش لحماية ارضه وشعبه، ولا يمكن تتم المهمة الا بتمن، بيقدمه كل بيت مصرى..الشعب المصرى من خلالكم بيقدم تمن الدفاع والحفاظ على بلدنا". ووجه السيسى باسمه وباسم مصر وباسم القوات جميعاً لكل بيت مصرى قدم شهيد او مصاب التحية، مضيفاً: "وده تمن للحفاظ على مصر، وبقول للمصريين متتصوروش حجم الخسائر لأبناءكم أبناء الجيش اللى غير ما تتصور عدد أهل الشر اللى قاموا بالعمل ده يوم الأربعاء اللى فات، فعلا مش أقل من 200 فرد".