ولا البنون بلو ريقي.. ”علي الحجار” يعيش كلمات تتر المال والبنون بعد هجوم ابنته ”بثينة” عليه

حالة من الجدل، تخللت إلى أسرة الفنان "علي الحجار" بعدما أقدمت ابنته "بثينة" على انتقاد والدها في فيديو عبر تطبيق "تيك توك" واثارت غضب رواد مواقع التواصل الإجتماعي بعد حديثها عنه بانه قد امتنع عن الإنفاق عليها ومرورها بضائقة مالية صعبة، جعلتها لاتتناول سوى "البقسماط" على حد قولها.

وبدى على ملامح "بثينة" الإجهاد والبكاء وانتشر الفيديو بشكل سريع حتى أن البعض هاجمها واتهمها بالخلل النفسي وتناول مواد مخدرة، بينما البعض الآخر تولى جبهة الدفاع عنها وبأن ما تعرضت له من ظلم والدها هو مادفعها إلى الإفصاح للجمهور عن حقيقة والدها.

وقالت بثينة في الفيديو: "مش عارفة أنا إزاي عايشة، إحنا عايشين إزاي يا جماعة، أنا مكلتش غير بقسماط من إمبارح أنا والقطط، كل شوية تحصل الفقرة دي"، متسائلة باستنكار وضحكة ساخرة: "هو مش أنا أبويا علي الحجار؟!".

وطالبت بثينة علي الحجار متابعيها بتوبيخ والدها قائلة: "ممكن يا جماعة كلنا ندخل نشتمه على الأكونت بتاعه بليز اللي يقدر يعمل كده عنده بوت أكونت أو حاجة خشوا اشتموا فيه عشان خاطري هتاخدوا ثواب والله العظيم أصل ده اختبار".

واختتمت ابنة علي الحجار حديثها قائلة: "هو ربنا بيبعت للناس TEST، أنت معاك فلوس وريني هتعمل بيها إيه؟.. ستات وريني هتعمل إيه بالستات؟، عيال.. هتعمل إيه بالعيال؟!".

بثينة تتحدث عن الفيديو المثير للجدل وتبرأ نفسها من الإدمان

أوضحت "بثينة" ان ما قالته في الفيديو الأول كان "لايف خاص" مع أصدقائها وما حدث هو لحظة انفعال بسبب غضبها من إهمال والدها لها ومعاناتها الوحدة فقالت: "أنا بس عايزة أتكلم عن الفيديو اللي انتشر، عشان أوضح كام حاجة مش هلحق أعمل كل ده دلوقتي، بس أنا كنت على طبيعتي في الفيديو، مش عارفة ليه الناس داخلة تكتب حاجات مفترية، وتقول إنتي مدمنة وطريقتك مش عارفة إيه، أنا داخلة بتكلم مع صحابي فيديو في الأوضة بتاعتي، وكان برايفت أصلا".

وتابعت "اللي قلته كلام أنا حاساه للأسف، كان نفسي علاقتي تكون كويسة مع عيلتي أو بابايا، بس الغلطة من عندهم، أنا آسفة جدا على الموضوع ده".

وعن تعاطيها المخدرات، قالت "بثينة لمتابعيها": "بتقولوا شكلها مدمنة بطلوا افترى يا جماعة، وبعدين طب ما تساعدوا واللي بيقولوا اشتغلي أنا في فترة مش لاقية شغل وتعبانة، ومريت بحاجات خلتني تعبانة اكتر، ومحدش يعرف صحتي عاملة إزاي ولا هو يعرف على فكرة أي حاجة، بطلوا تظلموا الناس لو مش هتعرفوا تساعدوا، خلاص واللي يقدر يجيبلي شغل اتفضلوا، أنا بكتب وأمثل وأترجم، وبعرف اشتغل، بطلوا تظلموا الناس وأتمنى إني أخد حقي".

"سحر حسن" طليقة علي الحجار ووالدة بثينة تشن هجوماً حاداً

من جانبها، خرجت والدة بثينة عن صمتها، وقالت ان مافعلته ابنتها هو فضفضة مع الأصدقاء في بث خاص وليس عام، ناشرة صورة لإبنتها بإطلالة مهندمة قائلة: "ده فيديو خاص لبنت بتفضفض مع صحابها، ومش للسرقة أو للنشر".

وأضافت: "وده شكل بثينة الحقيقي والطبيعي واللي هيتاجر أو هيعلي التريند هايعرض نفسه للمساءلة القانونية، واتقوا الله يا ملايكة ياللي قايمين من على السجادة، يا مدعي الشرف والاستقامة".

علي الحجار يهرب من الرد على فيديو ابنته

وفي السياق ذاته، رفض "علي الحجار" التعليق على تصريحات ابنته، وقال لبرنامج ET بالعربي: "أنا ماليش في لعبة السوشيال ميديا أو التريند".

يذكر أن المطرب "علي الحجار" قد شوق جمهوره لطرح أغنيه جديدة له، من توقيع الموسيقار الراحل عمار الشريعي، ناشرا البوستر التشويقي لها عبر حسابه الشخصي بموقع التواصل الإجتماعي "فيس بوك" قائلا: "أغنية مش فارق لي.. آخر لحن سابهولي صديقي العبقري عمار الشريعي، وكتب الكلمات الشاعر الكبير أيمن بهجت قمر، هتسمعوه بكره 16 أبريل وهيكون موافق عيد ميلاد عمار الشريعي".