حسين الشحات يوجه رسالة مؤثرة للجماهير

وجه حسين الشحات لاعب النادي الأهلي رسالة خاصة لجماهير الكرة بعد أزمة أحمد فتوح لاعب الزمالك وتضمنت حديثا عن مشكلته مع محمد الشيبي ووفاة الثنائي أحمد رفعت وإيهاب جلال.

وقال حسين الشحات للجماهير بشأن أحمد فتوح: أنا عايز أتكلم في موضوع كلنا بقينا بنتكلم فيه بس محدش حاسس بحاجة الموت قريب مننا كلنا وناس كتير بقت تموت من كتر الضغط النفسي وشوفنا أخونا وصاحبنا أحمد رفعت ربنا يرحمه والأب الروحي الكابتن إيهاب جلال ربنا يرحمه.

وأوضح لاعب الأهلي: من فترة قريبة كانت مشكلتي مع الشيبي وكان عليا ضغط ربنا وحده اللي كان عالم بيه وطلعت واعتذرت ودلوقتي مش عايزين نوصل موضوع أخويا أحمد فتوح لكده ونرجع نقول يا ريت كنا خفينا عليه فتوح غلط وقال أنا غلطت مش لازم نتكلم ونقول لا أنت غلطان ونضغط عليه أي راجل لما بيتطلع يعتذر ويقول أنا غلطت سامحوني أولا دي حاجة كبيرة جدا عند ربنا.

وأكمل: الراجل طلع وقال أنا غلطان وعايز يروح لأهل الميت ربنا يرحمه مش كل شوية نطلع ونقول حسين أنت شتمت حسين أنت غلطت نفس الكلام فتوح مش كل شوية نطلع ونقول أنت غلطان ادعوا لفتوح ربنا يهديه ويسامحه ادعي لحسين ادعي لأي إنسان بيغلط.