عزيز الشافعي: كنت اتمنى أغاني شيرين تنزل بطريقة أحسن من كدا

علق الملحن عزيز الشافعي، على حذف شركة روتانا للصوتيات والمرئيات لما قامت المطربة شيرين عبد الوهاب بطرحه من أغنيات عبر المنصة.

وقال عزيز الشافعي، في مقطع فيديو عبر حسابه بموقع تبادل الصور والفيديوهات إنستجرام: امبارح نزلت غنوتين من ألحاني لـ شيرين عبد الوهاب، مبسوط جدًا أن الغنوتين دول بالذات نزلوا، ولكن كنت أتمنى أنهم ينزلوا بطريقة أحسن من كده، والناس تشوفهم وتسمعهم على يوتيوب وكل المنصات ونشوف النجاح بالأرقام والتفاعل، شُفنا ده على يوتيوب قبل ما روتانا تقفل الأغاني وعلى تويتر، واللي كان مضايقني إني كنت أتمنى أنهم ينزلوا بطريقة أحسن من كده.

وأضاف،"

أنا عارف شيرين عملت كده ليه، ولغاية آخر لحظة كنا بنتكلم، شيرين وعدت جمهورها أنها هتنزل أغاني، وأصعب حاجة أن الفنان يبقى عايز ينزل ويغني ويشتغل ويتمنع علشان ورق أو وجهات نظر أو مواقف قانونية، معرفش كان إيه اللي المفروض يحصل، أنا بسمع من محامي روتانا كلام محترم ولكن بيقولوا شيرين دفعت 10 مليون جنيه شرط جزائي علشان إخلال بالعقد، ومع كل إخلال بالعقد هتدفع 10 مليون جنيه، يعني الأغنيتين بتوع إمبارح دول هتدفع عليهم 20 مليون جنيه؟ والفلوس دي مش مخصومة من الفلوس اللي خدتها شيرين ولا العقد وقف العقد مستمر وهي مطالبة أنها تقدم أغاني".

واستكمل:" من الناحية التانية محامي شيرين هل أنت ورقك سليم أنك تنزل أغاني؟ وإزاي لو سليم روتانا وقفته؟ روتانا معاها حق ولا لأ، ليه الأمور القانونية دي متنتهيش بشكل واضح، مش معقول اتنين محامين كبار يقولوا كلام عكس بعض، مشكلتنا أننا بنحب شيرين وعندنا شيرين واحدة بس وعايزين نسمعها ونفرح بأغانيها".