بعد نجاح العمل وتصدره التريند.. طه دسوقي يوجه الشكر لطاقم مسلسل ”حالة خاصة”

وجه الفنان طه دسوقي، بطل مسلسل "حالة خاصة"، الشكر لطاقم عمل المسلسل، وذلك بعد النجاح الكبير الذي حققه العمل منذ عرض أول حلقتين الأربعاء الماضي.

وكتب عبر حسابه على فيسبوك: "شكرا كلمة قليلة جدًا على كم الحب والمباركات اللي جايالي منكم من أول عرض المسلسل وأسف لو ملحقتش أرد على ناس كتير بس حابب أشكر أولا كل اللي سهل عليا إني أعمل شغلي وأسف لو هيبقى بوست طويل شوية، شكرا لكوتش التمثيل نديم اللي اشتغلنا مع بعض على الدور، شكرا للجمعية المصرية للتوحد ودكتورة داليا سليمان اللي ساعدوني أعرف أكتر وجاوبوني على أسئلة كتير جدًا عن التوحد وقابلوني بناس كتير على طيف التوحد من مختلف المراحل، شكرا عبدالله أشرف اللي قابلته في الجمعية وكان معايا في مرحلة التحضير وفادني جدا أني أتعرف عليه أكتر".

وأوضح: "شكرا للصديقة الممثلة ملك ياسر اللي ساعدتني بمعلومات كتير عن التوحد، خاصة المرحلة اللي فيها نديم، شكرا لصديقتي الدحيحة مراتي نادين اللي دايما في ضهري وتحمست معايا وقعدت دورتلي على حاجات أشوفها وأقراها عشان أعرف معلومات أكتر".

وتابع: "شكرا أستاذي وأخويا الكبير أحمد أمين اللي مترددش لحظة أنه يكون جنبي في أول حلقة من المسلسل واللي حقيقي من أكتر المشاهد اللي استمتعت بيها،

ثانيا شكرا لكل فريق العمل بداية من أستاذ طارق الجنايني اللي إختارني وحملني مسؤولية اني أكون ضمن المسلسل ده، مرورا بالمؤلف مهاب طارق اللي عمل حدوتة مهمة وسلط الضوء على فئة ناس كتير أوي متعرفش عنها حاجة وقرر إنه يضفر أحداثها بأغاني فرقة المصريين، والمخرج

عبدالعزيز النجار اللي أنا متأكد أني تعبته معايا، وكل فريق العمل اللي ورا الكاميرا من مهندسة الديكور سالي الشامي والستايلست فريدة فؤاد ومهندس الصوت عمرو عصام وصولا للمونتير اللي اشتغل عالمشروع بحماس ميقلش عن أي حد فينا كريم سعد، شكرا لكل كرو التصوير على رأسهم استاذ / محمد عبدالرؤوف".

وأختتم:"شكرا الأستاذة الكبيرة مقاما مش سنا غادة عادل على حبها وإحترامها لشغلها ودعمها ليا في مسلسل زي ده شكرا للعبقري هاني شنودة اللي ربط التجربة دي بالموسيقى بتاعته وبأغانيه وشرفنا كلنا بإنه يحط عليها إسمه واخيراً شكرا تاني لكل حد كتب عن المسلسل أو بعتلي أو باركلي وأتمنى باقي المسلسل يعجبكوا من قلبى شكرا".