حسن عيد للنهار : اكتسبت خبرة دور ضابط الشرطة من أصدقائي الضباط وانتظروني في «محارب» مع حسن الرداد

تحدث الفنان حسن عيد عن دوره في "حكاية شغف" أولي حكايات مسلسل أسود باهت، قائلاً : الحكاية كلها إثارة وتشويق ، وبجسد دور رئيس مباحث يدعي مجدي ، وهو اللي مسئول عن قضية شغف ، وأجمل حاجة في المسلسل إنك تقدري تتفرجي علي الحلقات كلها مرة واحدة بدون ملل .

وعن كواليس العمل مع الفنانة سهر الصايغ ، قال حسن عيد : سهر الصايغ أختي واشتغلنا مع بعض كتير ومبسوط جدا أني شغال معاها في هذا العمل ، والحقيقة كل الفنانين اللي في حكاية شغف ناس جميلة أوي بيفكروني بأيام ما كنت لسه طالب في المسرح ، وفيه روح حلوة بينا في الشغل ، ومحدش فينا مضغوط من الدور ، كلنا مبسوطين بالحكاية ومبسوطين ببعض ، والحقيقة كلهم مش أول مرة أشتغل معاهم .

وعن الوقت الذي يستغرقه لأخذ خبرات لتجسيد الدور، أضاف : فيه حاجة أسمها الذاكرة الأنفعالية ، اللي هي الواحد بيقعد يفتكر كل الأحداث اللي مرت عليه شبه الدور وكل الشخصيات اللي في حياته ، وأنا عندي كل أصدقائي ظباط شرطة بالتالي قدرت استمد منهم خبرات علشان أقدر أجسد الدور ، لإن مفيش وقت بعد ما بيتعرض عليا الدور أخد وقت علشان أقدر أجسد الشخصية لازم أكون جاهز .

وعن الأعمال الدرامية التي يشارك فيها خلال ماراثون رمضان القادم 2024, قال : إن شالله عندي مسلسل ( ب 100راجل ) مع الفنانة سمية الخشاب ، وهو إخراج إبرام نشأت ، وتأليف محمود حمدان ، وبجسد دور شاب اسمه عابد ابن الفنان محمد عبدالعظيم ، ويعيش داخل حارة شعبية شاب شعبي وغير ملتزم ولأول مرة أجسد دور زي ده ومبسوط بيه الحقيقة جدا ، وعندي مسلسل تاني اسمه ( محارب ) بطولة الفنان حسن الرداد ، وتأليف محمد السيد بشير ، وإخراج شيرين عادل ، وبجسد دور شاب صعيدي يسمي راجح وهو ابن عم حسن الرداد وفيه صراعات ومشاكل بينا علي الميراث داخل الأحداث ، مشيرا إلي حبه الشديد لتجسيد الأدوار الصعيدية ، قائلا : أنا صعيدي أصلا ومن قنا .

وعن أعتذاره عن المشاركة في العمل مع الفنان حمادة هلال في مسلسل ( المداح 4) ، قال : الحقيقة كنت محتفظ بدقني لإن كنت بشتغل في عمل تاني وبحضر ليه ، والمداح 4 كانوا عايزيني في دور ظابط شرطة ، فاللأسف مكنتش هقدر أبوظ شغل ناس تانية علشان أشتغل في عمل تاني ، وإن شاء الله تتعوض مع الأستاذ أحمد سمير فرج لإن الشغل معاه كله جميل وطبعا الفنان الكبير حمادة هلال فناني المفضل وبحبه جدا علي المستوي الشخصي والفني واتمني إن شاء الله إن اشتغل معاهم قريب .

وعن الدور الذي يتمني أن يجسده قال : نفسي أعمل دور مركب .

وعن الأعمال الفنية التي يتابعها خلال هذة الفترة قال : الحقيقة مفيش وقت نهائي إن اتابع مسلسل، أنا مشارك في مسلسل أرواح خفية مع الفنانة سمية الخشاب ونفسي الأقي وقت بس علشان أشوف المسلسل علي الموبايل .

وعن مشاركته في أدوار كوميدية ، أضاف : للأسف مستحيل أقدر أشارك في عمل بدور كوميدي ، لإنه صعب جدا وبيكون ريسك علي أي فنان هو أصلا معندوش الحس الكوميدي ، لكن ممكن أعمل دور كوميدي لايت بيكون سهل أكثر.