المذيعة أميمة بدري تفقد النطق بعد تعرضها لأزمة نفسية شديدة: محتاجة دعواتكم

كشفت المذيعة في قناة DMC أميمة بدري، أنها فقدت النطق بعد تعرضها لضغط نفسية.

ونشرت أميمة فيديو قصير لها عبر صفحتها الشخصية على فيس بوك، وهي تحاول التحدث لجمهورها ليطمئن عليها معلنة فقدانها للنطق، إثر تعرضها لأزمة نفسية.

وأضافت: أنا دكتور كتبلي أدوية، وقالي لازم ارتاح تماما، وخلال 3 أيام لو مش اتحسنت، ورجعت اتكلم هتابع مع دكتور أعصاب، وأعمل جلسات كهرباء، لأعرف أتحسن ادعولي أعرف أنطق تاني، وأرجع لحياتي، أنا نفسيًا مش أحسن حاجة دعواتكم وشكرا للتواصل معايا، ولكل واحد حاول يكلمني، ويساعدني وشكرا للي جالي البيت ووداني المستشفي دعواتكم.

وظهرت بدري خلال الفيديو وهي تتحدث بصعوبة: أنا تمام بس ادعولي، أنا مش عارفة أتكلم، وتبيّن على ملامح وجهها البكاء الشديد خلال محاولتها التحدث.

وكتبت أميمة على الفيديو: شكرًا لكل حد بيسأل وبيطمن عليا بس ده حالي، وصوتي طلع حبة الصبح مكانش في أي صوت، ولا حركة شفايفي ولسة تعبانة، فمش عارفة ولا قادرة أتواصل قُلت أطمّنكم بحالي هنا أسهل، دعواتكم والحمد لله علي كل شيء، متابعة: بقولكم آسفة لكل حد بيطمن، ومش عارفة أرد بس ادعولي أكون كويسة.

وكانت أميمة بدري قد نشرت صباح اليوم صورا لتقاريرها الطبية عبر فيس بوك وعلقت عليها: الحمد لله رب العالمين علي كل حاجة حصلت ليا، أنا بكتب وانا مش قادرة لاطمنكم أنا روحت المستشفى، وعملت الأشعة المقطعية علي المخ، الحمد لله مفيش جلطة، بس للأسف فقدت النطق، بسبب إني زعلت جامد، ادعولي دعوة صادقة، أنا محتاجة، لدعواتكم وشكرا لكل اللي بيكلمني بس حرفيا مش قادرة من الصدمة.