هالة صدقي: فكرت أعتزل الفن قبل جعفر العمدة.. ومهما عملت أدوار بعده هيكون فيه مقارنة

كشفت الفنانة هالة صدقي عن تفكيرها في اعتزال الفن قبل تقديمها شخصيتها في مسلسل جعفر العمدة، التي حققت من خلالها نجاحا كبيرا، موضحة أنها مهما كانت الشخصية التي ستقدمها فيما بعد سيقارن الجمهور بينها وبين شخصية صفصف في جعفر العمدة.

وقالت هالة صدقي في تصريحات تليفزيونية: كنت بفكر أعتزل الفن قبل دوري في جعفر العمدة، لإن فيه كام تجربة ورا بعض حسيت إن الحكاية باظت شوية مش ده اللي أنا متربية عليه، يعني المخرجين الورق بيتكتب في اللوكيشين والبطل ممكن يلغي المؤلف خالص ويغير مخرجين، وألاقي لو في بطل أو بطلة تاني نفطس دور تاني عشان نجاملها، ودول بيشتغلوا لمصلحة أشخاص، الوكويسين بقوا قليلين أوي.

وأردفت: محمد سامي مخرج مختلف وشارب من الجيل القديم، هو كوكتيل من قديم وجيل جديد بنظرة جديدة، وقبل ما يكتب صفصف كلمني وقالي جالي فكرة أكتبها؟ بس هي أم لولدين كبار قولتله أنا ممثلة، هو ممثل مش حقيقي ومتواضع وبيفكر برا الصندوق، وعلشان كده هو محمد رمضان ركبوا مع بعض جدا لإنهم بيفكروا برا الصندوق.

هالة صدقي: الناس حبوا صفصف مش أنا.. وأنا شبه نسيت اسمي

وأكدت الفنانة هالة صدقي أنه سيكون هناك مقارنة بين أعمالها المقبلة ودورها في مسلسل جعفر العمدة، قائلة: الناس حبوا صفصف مش هالة صدقي وأنا شبه نسيت اسمي، كله بيقول الملكة صفصف طول الوقت في الشارع، ومهما قدمت بعد كده هيكون في مقارنة بين الدور وبين صفصف، وربنا يرزقني بموضوع كويس إن شاء الله.

وأضافت: أنا كل حاجة بعملها مميزة، وأنا محظوظة إني اشتغلت مع مخرجين كبار مهمين، وعندي مجموعة حاجات سعيدة إني عملتها وفخورة أنها موجودة في الملف بتاعي.

هالة صدقي عن مشاهد تدخينها الشيشة في مسلسل جعفر العمدة: مبشربش الشيشة

كما كشفت هالة صدقي كواليس مشاهد تدخينها الشيشة في مسلسل جعفر العمدة، قائلة: مرة كنا في حدث وكان في استقبال غير عادي، محمد سامي لقاني مش مبسوطة وسرحانة قولتله طب لما إحنا كده أنا هعمل إيه بعد كده؟ وهلاقيك أنت فين تاني؟ وكنت سايبة نفسي معاه ومشكلتنا إني مبشربش شيشة أنا بكرها وبكره الدخان، ومحمد سامي قالي لازم تتعلمي، وكل الأزياء كان معمول لها جيوب علشان الشخصية حاطة المعسل في جيوبها طول الوقت.