ميدو: معادلة كولر الصعبة في ماتش الهلال هي ازاي يهاجم وميستقبلش أهداف

تمنى الكابتن أحمد حسام "ميدو" لاعب فريق نادي الزمالك والمنتخب المصري السابق، تأهل فريق النادي الأهلي من دور المجموعات على حساب فريق الهلال السوداني والذي سيلاقيه يوم السبت المقبل الموافق الأول من شهر أبريل في منافسات بطولة دوري أبطال أفريقيا، قائلاً: "التأهل من المجموعة كان خلاص راح على الأهلي، لكن ربنا له حكمة ويختبر رجولة لاعبي الأهلي وإصرارهم على التأهل، ولو مستغلهاش الأهلي يبقى ميستحقهاش، كلنا كمصريين سواء أهلاوية أو زملكاوية عايزين الأهلي يكسب، ومينفعش زملكاوي يتهمنى تأهل الهلال على حساب الأهلي، احنا لينا قرايب وأصحاب بيشجعوا الأهلي، ولو هتخير بين تأهل الأهلي أو الهلال، هختار إن الأهلي يصعد وأخويا يفرح".

وكما حذر كابتن "ميدو" لاعبي فريق النادي الأهلي من التسرع في مواجهة نادي الهلال السوداني خلال المباراة المرتقبة، قائلاً "الاستعجال هيعمل نتيجة عكسية على الأهلي، لازم الأهلي وهو بيهاجم يهتم جدا إنه ميدخلش فيه هدف عشان ميدخلش في حسبة بيرما، المعادلة الصعبة اللي كولر محتاج يفك شفرتها هي ازاي الأهلي يهاجم وفي نفس الوقت ميستقبلش أهداف، ودي محتاجة إن الظهيرين ميندفعوش طول الوقت، مع وجود لاعب ارتكاز رقم 6 قوي، أنا متأكد إن كولر هيشتغل على انصهار اللاعيبة مرة تانية مع الفريق من أول بكرة بعد تجمع الفريق كله، إلى جانب وقفة الفريق الدفاعية وازاي هيشتغل على تعطيل الهجمات المرتدة، وكولر هينبه على اللاعيبة عدم الاندفاع، وخصوصا ياسر إبراهيم، اللي بيبيع نفسه في مواقف الهجمات المرتدة، لازم كولر ياخد حذره من سرعات مهاجمي الهلال"

وأختتم أحمد حسام حديثه مؤكدًا على أن "كابوس أي مدرب إنه يلعب ماتش قوي بعد التوقف الدولي، لإنه هيكون حاطط ايده على قلبه إن لاعب يتصاب مع منتخب بلاده، أؤكد لكم أن الشناوي سليم وتمرن مع الفريق بشكل طبيعي، والحمدلله إن لاعبي المنتخب راجعين بمعنويات مرتفعة بعد الفوز على مالاوي، وأيضًا معلول ظهر في تدريبات الأهلي اليوم لكنه خاض مرانا منفردا، ومن المهم دلوقتي للأهلي التحضير النفسي لماتش الهلال، بعد رجوعهم من أجواء المنتخب لأجواء الفريق مرة تانية".