النهار
الأحد 16 يونيو 2024 06:12 صـ 10 ذو الحجة 1445 هـ
جريدة النهار المصرية رئيس مجلس الإدارة ورئيس التحريرأسامة شرشر

حوادث

حازم في دعوى طلاق: ”مراتي طلعت حرامية طعمية وفضحتني”

أرشيفية
أرشيفية

يقف الشاب الثلاثيني "حازم"، أمام منصة محكمة الأسرة بالتجمع الخامس، منكس الرأس ويروي تفاصيل زيجته التي تسببت له في مشاكل عديدة على مدار سنة كاملة، وردد: "مراتي بتسرق الطعمية من المطعم تحت البيت وفضحتني في المنطقة كلها".

بدأ الشاب يروى تفاصيل صادمة لأول مرة عن أسباب إقامته دعوى طلاق للضرر أمام محكمة الأسرة بالتجمع الخامس، قائلًا: "اتجوزت من سنة ونص وعشنا حياة زوجية سعيدة لشهور تبادلنا خلالها الحب والمودة، ومع مرور الوقت لاحظت تغيير في سلوك زوجتي وتصرفات غريبة.. "تسرق أي حاجة تقدر عليها".

وتابع حازم أمام محكمة الأسرة: "الموضوع اتطور مع الوقت، وحذرتها كتير، لكنها استمرت في السرقة والناس بدأت تلاحظ وتشكو ليا وأنا في نص هدومي لما حد يقولي مراتي سرقت حاجة، المشكلة أنها حاجات تافهة، أنا صاحب سوبر ماركت والحالة المادية كويسة مش مخليها محتاجة حاجة".

وأكمل: "أديتلها فرص وقولت هتتغير، وأنا راجع في مرة من الشغل وقفني صاحب مطعم الفلافل اللي تحت البيت، وقالي إن مراتي سرقت طعمية والناس شافتها.. زوجتي طبعا اتعصبت وأنكرت أنها عملت كدا، وأنا بدأت اتخانق مع الراجل مش هقبل يقول كدا على مراتي، فجأة لقيت صاحب المطعم جمع العمال عنده ونزلوا فيا ضرب في وسط الشارع".

وأردف: "رجعنا البيت حصل بينا مشاجرة عنيفة جدا، وبلغتها أننا لازم ننفصل لكن هي رفضت وهربت عند بيت أهلها، الحياة بينا مستحيلة مش هعيش مع واحدة حرامية، ومش هقبل حد من ولادى يطلع زيها ولا هكون مستريح وهي تربيهم".

واختتم الشاب حديثه: "حاولت معاها ننفصل بالود لكنها رفضت و بقيت عند أهلها، فقررت ارفع دعوى طلاق للضرر وتحمل رقم 1387 لسنة 2022 في محكمة الأسرة بالتجمع، ولم يتم الفصل فيها حتى الآن".