تعليق قوي من عمرو أديب بعد خسارة الأهلي من فلامنجو

علق الإعلامي عمرو أديب، على خسارة النادي الأهلي من فلامنجو البرازيلي واحتلاله المركز الرابع بكأس العالم للأندية المقامة في المغرب.

وقال عمرو أديب خلال برنامج “الحكاية” المذاع على قناة “mbc مصر”: "نشكر النادي الأهلي على أداء لعيبته في كأس العالم للأندية عملوا اللي يقدروا عليه".

وأضاف:"الأهلي هزم نفسه وبصراحة الفرقة دي مش برازيلي أوي نص سوا وليست فرقة قوية جدًّا والأهلي كان ممكن يظهر أحسن من كده شوية، ولكن لازم أشكر اللعيبة والمجهود اللي عملوه ومجهود كويس وكان نفسنا ياخدوا البرونزية الرابعة أنا برضو ما أقدرش أتجاهل إن الأخطاء كانت مرعبة ضراء الجزاء اللي ضايعة والأجوان اللى ضيعها شريف المخيف واخطاء الشناوي والخطأ بتاع ديانج، حسيت ان ممكن الماتش يطلع أحسن من كده والأهلي يطلع أحسن من كدا، ليه بيبقى حلال لما الزمالك يتلغب أهل مصر كلهم يتكلموا عن هزيمة الزمالك إنما ما ينفعش أتكلم عن الأهلي، أنا من حقي اتكلم عن الأهلي ممثل الكرة المصرية، وعلي فكرة نفس اللي حصل في ماتش الريال حصل أمام فلامنجو البرازيلي، وليه المدرب ساب حسين الشحات لآخر 3 دقائق ليه؟ إيه الحاجة العظيمة اللي بنتفرج عليها دي؟ رغم ضياع معلول ضربة جزاء لازم أقول يا بخت الأهلي بمعلول لاعب محترم ومخلص ولازم اشير لأحمد عبد القادر الموهوب الحريف، كولر مسؤول عن الهزيمة بنسبة 75% لإنه حط التشكيل غلط من الأول، وعايز أسأل سؤال هو ليه الأهلي معندهوش مهاجم لو الأهلي عنده مهاجم كان يقدر يجيب اجوان كتير، الأهلي ليه ما بيشتريش مهاجم؟ ومع كل هذا بنشكر الأهلي علي المجهود والأداء وان شاء الله يرجعوا يكملوا مسيرتهم في افريقيا والدوري المصري عايز اسأل اي مواطن اهلاوي النهاردة انتوا شايفين الأهلي النهاردة قد ادى اداءا جيدا في هذه البطولة ولو اَه نام مرتاح، شيل الماتشين اللي في الأول لإن هما فرقتين ملهومش في الكورة، هل الأهلي أدى الأداء الجيد في البطولة؟ وهل ستتذكرون أداءه في البطولة؟".