برسالة مؤثرة.. أشرف عبدالباقى يُحيي ذكرى وفاة علاء ولي الدين

حرص الفنان أشرف عبدالباقي، على إحياء الذكرى الـ20 لوفاة صديقه الراحل علاء ولي الدين، وذلك عن طريق كشفه عن عدة مواقف جمعته بالراحل علاء ولي الدين.

ونشر أشرف عبدالباقي صورة لصديقه علاء ولي الدين، عبر حسابه الرسمي بموقع الصور والفيديو إنستجرام، وعلق قائلًا: ربنا يرحمك يا علاء زي النهارده من عشرين سنة اتوفى علاء ربنا يرحمه ويغفر له يا رب، وبرغم إن فات عشرين سنة على وفاته، لكنه كان وما زال أقرب صديق ليا.

وأضاف: أول مرة أطلع عمرة كان معاه وإحنا رايحين الكعبة قالي بص في الأرض لغاية ما نوصل والكعبة تبقي باينة، وأقولك بص وادعي ويمكن الحكاية دي بقيت أعملها مع أي حد يعمل عمرة لأول مرة وادعي لعلاء، وفي حياته كنت بشوف الخير اللي بيعمله مع ناس كتير واتعلم منه بشكل مباشر وغير مباشر.

وتابع: علاقتنا كانت أكتر من إخوات ومن خلاله كنت بشوف باقي أصحابنا، لأنه كان كريم جدًا ومضياف جدًا وفي بيته كنت بحس إني في بيتي، ووالدته الله يرحمها زي والدتي اللي اتوفت وأنا في سن صغير، وخالد أخوه الله يرحمه ومعتز ربنا يكرمه ويخليه لأولاده زي إخواتي وقت ماكنت أحس إني متضايق أروحله أتكلم معاه وأرتاح، مكانش يعدي يوم إلا لما نتقابل أو نتكلم في التليفون نعرف أخبار بعض.

واختتم حديثه: صادف أن يوم وفاته كان أول يوم عيد الأضحى وبعد ما وقف على الأضحية اتوفي وكنا على ميعاد يومها في المسرح، لعرض مسرحية لما بابا ينام اللي انتهت بوفاته، ربنا يرحمك يا علاء ويصبر أهلك وأصحابك اللي أكيد ما دام عرفوك عمرهم ما هينسوك.