نرمين ماهر: أقدم فى أخر الزمن شخصية مختلفة ومش بحب برامج المقالب

موهبة إستثنائية حرصت منذ بدايتها على تقديم أدوار مختلفة قدمت عدة أعمال مميزة

تكشف الفنانة نرمين ماهر فى حوار لـــ "النهار" عن أهم أعمالها و الجديد فى الفترة المقبلة

ما هي تفاصيل مسلسل أخر الزمن ؟

مسلسل أخر الزمن مكتوب حلو جدا والسيناريو رائع ومكتوب بحرفية وده اللي شدني للمسلسل، المسلسل بيناقش قضايا الأسرة المصرية، بتلاقي حاجات داخل البيوت المصرية حلوة مش بحث بيها في الواقع لكن لما قرأت الورق حسيت باد ايه ان في حاجات حلوة وكويسه فى البيوت المصرية، آخر الزمن هو مسلسل اجتماعى والناس هتحبه وهيشد فئة كبيرة من الجمهور.

عايزين نعرف دورك في المسلسل ؟

أنا بجسد في المسلسل شخصية جورنال هي شخصية شريرة،يعنى مش شريرة أوى، بس هي ليها دوافع كثيرة إلى خلتها تبقى شخصية قوية وفي بعض الأحيان بتبقي قاسية جدا وده نتيجة الظلم والضغط إلى أتعرض ليه في أحداث المسلسل ، هتحاول تأخذ حقها بشكل أو بأخر، نتيجة أحداث كثيرة حصلتها في حياتها، والقلبة ما بين إنك بني آدم طيب وفجأة من كثرة الظلم والضغط تتحول.

مين إلى رشح نرمين ماهر للدور؟

الصراحة معرفش مين أول واحد رشحني ، لأن كلهم كلموني في نفس التوقيت تقريبا كلهم اتفقوا على الشخصية وقالوا نرمين ماهر هي الأنسب لهذه الشخصية وفى وقت قصير قاعدنا ودلوقتى بنصور.

نرمين ماهر بتحدد المشاركة من قراءة الورق ولا بتركز على فريق العمل كمان ؟

الصراحة بركز على الاثنين الأول الورق بركز فيه جامد لأنه لو الورق مشدنيش مش هشارك في العمل وفى الاخر لازم يكون البوكيه كامل.

في الفترة الحالية أغلب الأعمال بتناقش قضايا الأسرة؟

مين قال فى الفترة دى بس الأعمال الدرامية بتناقش قضايا الأسرة من زمان مش من دلوقتى، ولو ركزت هتلاقى نفس الفكرة بتتكرر بس كل مرة بزاوية مختلفة، وهنا بيجى دور المؤلف لأنه بيكتب الأحداث بطريقة تواكب الفترة إلى إحنا فيها، وأرجع وأقولك إن الورق هو الى بيحدد الشخصية ومسار العمل رايح على فين.

رأيك إيه في المنصات الإلكترونية ؟

تقريبا 80% من الوطن العربي بيتفرج على الموبايل، ودلوقتى فى اكتر من 20 منصة على شبكة الانترنت فطبيعي جدا هتلاقى المنصات مستحوذة على نسب المشاهدة العالية.

رأيك إيه في مسلسلات السباعيات والخميسات في الدراما؟

فكرة حلوة وبقينا طول السنة في أعمال موجودة مش رمضان فقط، هتلاقى حكايات مسلسل شغالة معاك طول السنة وبتكون قصة واقعية بتشدك ومفيش حرق في الأحداث بتلخص حاجات كتيره جدا وبتحددلك هتتفرج على إيه.

رد فعلك إيه لو رامز جلال عمل فيكى مقلب؟

بعد الشر أنا ماليش في جو المقالب ده بخاف منه، لأنه مش بيجى من ورآه غير الخسائر، خسائر نفسية وتريقه على السوشيال ميديا، رد فعلك ساعتها بيكون غير متوقع لأنك بتكون في حالة عصبية جدا ورامز جلال ساعات كتير بيزودها مع الضيوف وده وبيخرجهم عن شعورهم.

طيب شايفه إزاي رامز جلال في المقالب ؟

بص طول ماهو بعيد عنى دمه خفيف، أخدنا عليه خلاص لازم ساعة الفطار نفتح التليفزيون ونتفرج على رامز جلال جايب مين والأهم المقدمة إلى يقولها على النجم اللي هيعمل فيه المقلب، وأتمنى من رامز إنه يقدم فكرة جديدة ومختلفة عن إلى قدمهم في السنوات الماضية، عاوزين حاجة جديدة يا رامز.

ما سبب اختفائك وظهورك فجأة؟

مش بكون قاصدة نهائي إني أختفي فجأة وأظهر فجأة، بيجى عليك وقت بيكون في لحظات تركيز ولازم تعيد حساباتك عشان تعرف تطلع بحاجة جديدة وبرضه لما تشوق الناس مش على طول تكون متواجد قدامهم هيزهوا منك فلازم تاخد هدنة كده مع نفسك وتختار الأعمال المناسبة ليك.

في أعمال جديدة لنرمين ماهر في السينما الفترة المقبلة؟

بنحضر لفيلم جديد مع الفنان سامح حسين والفنان بيومى فؤاد، لسه في فترة التحضير والورق لسه بيتكتب وفور انتهاء الورق هنصور على طول.