بعد اتهامها بالجحود.. ابنة الفنان عمرو محمد علي: أمي بطلة وربنا يشفيك

وجهت شهد ابنة الفنان عمرو محمد علي، رسالة إلى والدها، بعدما اتهمها بالجحود، فضلًا عن اتهامه لوالدتها بتخليها عنه بعد مرضه، خلال لقائه مع برنامج «واحد من الناس»، مع الإعلامي عمرو الليثي.

وظهرت شهد عمرو محمد علي، في مقطع فيديو عبر حسابها الشخصي على موقع التواصل الاجتماعي «فيسبوك»، تحدثت خلاله عن والدتها، وكشفت تفاصيل عن أزمتها المزعومة مع والدها.

وقالت شهد عبر مقطع الفيديو: "ما كانش نفسي اتحط في موقف زي دا، بقالي كتير ساكتة، وكتير طلبت من مامتي ما نتكلمش في الموضوع لأنها حياتي الشخصية ومش عاوزة حد يعرف عنها حاجة ولكن الموضوع زاد".

وتابعت نجلة الفنان عمرو محمد علي، حديثها قائلة: "أعرفكم بنفسي أنا شهد عمرو محمد علي بنت الفنان عمرو محمد علي، معظم الناس هتتفاجئ باسم شهد لأنه بالنسبالي هو اسم في البطاقة.. أنا مش هتكلم عن أي حاجة مش هتكلم عن أنه قال عني إني جاحدة؛ لأنه في الأول والآخر هو بابايا وما أحبش أن أرد وهو يرد قدام الناس أنا با تمنى له الشفاء، ولكن أنا طالعة اتكلم عن الناس اللي بتظلم والدتي".

وأضافت، "ما حدش يحكم على حد وهو ما يعرفش القصة أنتوا بتسمعوا بس ما حدش عارف هي عملت إيه وإيه حصل ما بينهم أدى لانفصالهم، ما حدش عارف هي عملت إيه عشاني، أنا داخلة على 20 سنة وأمي هي اللي بتصرف عليا كل حاجة، الست دي عملت عشاني كتير وما استحملش أني أسمع عليها نص كلمة، ما حدش عارف الحكاية وحرام طول الوقت ألاقي مكتوب الست اللي سابت جوزها ومش أصيلة".

واستطردت شهد قائلة: :كل اللي عارفنا عارف أن الست دي بطلة وعملت كل حاجة في الحياة عشان أبقى إنسانة متعلمة عارفة تتكلم دلوقتي وكله بفضلها هي بس كفاية تحكموا علينا ورسالة أخيرة لوالدي وأهل والدي أنا بادعيله بالشفاء هو أبويا مهما كان، ولأهلي أنا أسفة بس أنا مش مسامحة في أي كلمة باطل اتقالت في حق مامتي".

تجدر الإشارة إلى أن الفنان عمرو محمد علي كشف عن إصابته، بمرض تصلب الأعصاب المتعدد، والذي كان سبب في عدم إكمال مسيرته الفنية، بحسب تصريحاته.

وبدأ الفنان عمرو محمد علي، مسيرته الفنية منذ منذ طفولته منتصف الثمانينيات، وشارك في العديد من الأعمال الفنية ومن أبرزها مسلسل «أرابيسك»، وآخرها دوره في مسلسل «حدائق الشيطان»، بطولة الفنان السوري جمال سبيمان، وإخراج إسماعيل عبدالحافظ.