صبا مبارك: مليش في جلسات تصوير الفنانات.. ويعجبني الراجل الناجح

قالت الفنانة صبا مبارك: تخنت 12 كيلو من أجل دوري في فيلم "بنات عبد الرحمن" علشان أقدر أجسد المشاهد بشكل كويس".

ظهور السينما الأردنية

وأضافت خلال لقائها ببرنامج "الحكاية" الذي يقدمه الإعلامي عمرو أديب علي قناة "ام بي سي مصر": فيلم "بنات عبد الرحمن" أول فيلم أردني يتم عرضه في دور السينما المصرية.

جلسات تصوير الفنانات

ولفتت: "مليش في جلسات تصوير الفنانات والسوشيال ميديا بالنسبة لي حاجة غريبة وبخاف اتصور وارفع صوري على السوشيال ميديا لإنها شغلانة فوق الشغلانة، ولا يمكن اتصور عن عمد علشان أرفع صوري على السوشيال ميديا".

حياة صبا مبارك

وتابعت: "فيه ناس بتعتبر صورها على السوشيال ميديا مهمة علشان الشغل، ولكن أنا مش شايفة ده ضروري، وانا طول الوقت مشغولة جدا.. بقرأ كتير في علم النفس وتحليل الشخصيات والأدب والمسرح وفي الإخراج والإنتاج الفني، وانا بعيدة عن السياسة علشان بتتعبني، وباكون مع عائلتي".

اهتمام صبا مبارك

وأكملت: "يهمني يكون بيتي حلو أوي، وميهمنيش نوع الساعة اللى لابساها، وبلبس الحاجة اللى بحبها، ومش بحب الشوبينج".

أهم ميزة في شريك الحياة

وأشارت: "مش قصة ماديات اللي تشغلني في الشخص اللى ارتبط به، مش عايزة ارتبط بحد اقل مني نجاحا في مجاله أيا كان المجال اللي شغال فيه، وشغلانتنا صعب جدا حد يستحملها ولازم يكون حد قوي اللى يتجوز من ممثلة".

الوسط الفني المصري

وتابعت: "كل الرجالة اللى اشتغلت معاهم لذاذ أوي، الوسط الفني المصري من انضف الأوساط الفنية اللى شوفتها والناس لطيفة وبها قدر من الاحترام ودمهم خفيف وعشرية".

أزمة الأسعار

وأشارت: "انا متبهدلة في أزمة الاسعار لأن جزء من دخلي بطلعه برة مصر لإن عندي عائلة وناس بصرف عليهم، بس الأسعار غليت مش بس في مصر ولكن كمان في لندن ولقيت في لندن الدنيا متأثرة وفيه حاجة حزينة".