انفراد… جرجرني وسحلني على الأرض.. ماذا قالت ”نورا فتاة المعادي” بالتحقيقات؟

واقعة مروعة أثارت حالة من الجدل عبر مواقع التواصل الاجتماعي، بعد انتشار صور لفتاة تدعى "نورا"، مصحوبة بتعليقات أنها تعرضت للاختطاف والاعتداء بالضرب من قبل والدها الذي انتزعت من قلبه كل صور الرحمة والإنسانية، وتصبح جملة "نورا فتاة المعادي" هي حديث الساعة عبر منصات التواصل الاجتماعي.

وتنفرد "جريدة النهار المصرية"، بنشر نص التحقيقات في قضية اختطاف المجني عليها نورا، والتي أثارت حالة كبيرة من الغضب عبر مواقع التواصل الاجتماعي.

وإلى نص التحقيقات:

س/ ماذا حدث بشأن الواقعة محل التحقيق؟

ج/ اللي حصل أني من أم كورية وأب مصري واتولدت في كوريا وتقريبا جيت مصر وأنا عندي خمس شهور وكنت عايشة مع جدي ومراته وهما اللي متولين رعايتي وكل أموري وأبويا كان عايش في اليابان وبينزل كل سنة مرة أو كل سنتين وكنت بشوفه في البيت بيجي يقعد مع جدي مرة ولا اتنين في الفترة اللي هو موجود فيها والأمور كانت ماشية تمام لحد ما خلصت ثانوية عامة في ٢٠١٨ أبويا كان عايز يدخلني كلية طب في اليابان وأنا كنت رافضة وجدي كمان كان رافض وحصل مشكلة بينه وبين والدي عشان أبويا راح سحب الملف بتاعي من الأكاديمية البحرية في اسكندرية وساعتها جدي رفع عليه دعوى أسرة بضم حضانتي والولاية التعليمية والأمور مشيت وجدي كان متولي مصاريف دراستي ومتكفلين بكل حاجة خاصة بيا ومن الوقت ده مشوفتهوش لحد وفاة جدي في أكتوبر ٢٠٢١.

س/ وما الذي حدث في أعقاب ذلك؟

ج/ عرفت إن أبويا رجع مصر وكان قاعد في بيت مامته في المعادي، وكنت بشوفه في أول شهر تقريبا يوم ويوم والفترة اللي بعد كدة بقيت بشوفه قليل جدا وجالي البيت عشان يسأل عليا ملقانيش ومرات جدي قالتله أ في فرح واحدة صاحبتي وأنا فعلا كنت بايتة عند واحدة صاحبتي وتاني يوم كان فرحها وخلصت الفرح ورجعت البيت، ولقيته جالي يوم ٤ يونيو ٢٠٢٢ على الساعة ٨ وخبط فمرات جدي فتحت وبعدين سمعت زعيق ولقيته جالي وأنا نايمة في الرسيبشن وجابني من شعري وسحلني وضرب فيا ومرات جدي كانت عمالة تصرخ وهو جرجرني على الشارع وفضل ماسكني من شعري وجرني من إيدي في الشارع وراح بيا على بيت مامته ودخلني في الشقة التانية بتاعته ولقيت مراته اليابانية وولاده الاتنين ودخلني الأوضة وقعد يضرب فيا تاني وقفل عليا بالمفتاح.

س/ وما الذي بدر منك بعد ذلك؟

ج/ يومها بليل أنا فتحت الشباك بتاع الأوضة ولقيت المسافة قريبة فنطيط من الدور الأول عشان أهرب منه بس لما نزلت لقيت سور العمارة طويل ومعرفتش أطلع منين وهو نزلي عشان سمع صوتي وراح ضاربني ومطلعني تاني وقفل شباك الأوضة بمسامير وقفل باب الأوضة تاني ومن ساعتها وأنا مش معايا حاجة ولا تليفون ولا أي وسيلة أقدر أتواصل بيها مع حد ومراته كانت بتدخلي الأكل ولما كنت بحتاج أدخل الحمام كنت بخبط على الباب عشان يفتحولي وقعدت على كدة ٥ أيام تقريبا.

س/ وما الذي بدر من والدك آنذاك؟

ج/ هو بدأ يقولي إني أبدأ أتحرك في البيت عادي وأدخل المطبخ وطبعا لازم حد يكون صاحي، لحد ما في يوم لقيت عمي بيقولي أنه هيوديني بيتي وأن كل حاجة هتتحل بس بشرط أني أجي النيابة وأقول إن محصليش حاجة وأني مش بتهمة وطبعا أنا قلتله تمام عشان أخرج وبعدها وداني النيابة ومشي.

س/ وهل من ثمكةة خلافات بينكما؟

ج/ اه فيه خلافات بس هو أصلا مكانش عايش معايا وأنا كنت قاعدة لوحدي مع جدي ومراته.

س/ وما الذي حال دون إقامتك برفقة والدك ووالدتك؟

ج/ عشان أنا أبويا وأمي منفصلين وبابا أخد الجنسية اليابانية وعايش هناك وماما كورية الجنسية أصلا ومعرفش عنها حاجات كتير احنا بس بنتكلم كل فترة مش أكتر.

س/ وما سبب حدوث خلافات بين جدك ووالدك؟

ج/ هو كان عاوز يسفرني اليابان أدرس طب وأنا كنت رافضة.

س/ وما سبب رفضك تحديدا؟

ج/ عشان أنا مش عايزة أسيب البلد وكمان أنا في عمري كله مشوفتهوش غير مرات قليلة فمعرفش هعيش معاه إزاي في بلد غريبة.