كيرلس الرابع جمهوريه على الثانوية لـ ” النهار” : كنت بأخذ دروس فى كل المواد و لم اصدق أن ضمن العشرة الأوائل إلا بعد أن اتصل بى د. عربى أبوزيد

سوهاج : عبير أبو المعارف

من بين العشرة الأوائل على مستوى الجمهورية حصدت سوهاج المركزين الرابع والخامس و اللذان كانا من نصيب الطالب كيرلس خالد شنودة، الحاصل على المركز الرابع علمي علوم بمجموع 399 درجة من مدرسة الغريزات الثانوية المشتركة ، والطالبة بسملة محروس رشاد أحمد الحاصلة على المركز الخامس " أدبي " بمجموع 381 درجة من مدرسة سوهاج الثانوية بنات و قد أجريت حواراً مع كل منهما ننشره تباعاً و البداية مع الرابع .

-- فى البداية سألت كيرلس كيف استقبلت خبرأنك الرابع على مستوى الجمهورية ؟ اوصف لنا شعورك ؟

- سمعت الخبر من والدي ووالدتي بصراحة كنت مذهول صدمة حلوة مش كنت متوقعها ،كنت حاسس اني بحلم خاصة كنت لسه صاحي من النوم لكن عندما اتصل بي وكيل وزارة التربية والتعليم د. عربي أبوزيد وهنأني وقالي انا فخور بيك ياكيرلس واتمنى لك استمرار التفوق والنجاح، أبتديت أصدق واستوعب الموضوع بفرحة ودموع وشعور ميتوصفش وماما وبابا كانوا فرحانين اكتر مني كمان...

-- كيف نظمت وقتك وعدد ساعات المذاكرة؟ وهل كان لك جدول ؟

-الحقيقه كنت بذاكر وحدد لنفسي كميه معينه أخلصها، لكن مش برتبط بعدد ساعات معينة . وكنت مقسم المواد على جدول لكل مادة يوم..

بابا وماما كانوا بيضغطوا عليك من أجل مزيد من المذاكرة ؟

بالعكس ماما وبابا كانوا دايما يقولو كفايه كدا نام شوية واصحى كمل

-- لمن تهدي هذا النجاح والتفوق ؟

- أهدى نجاحي لأهلي وخالي وائل لوقا، سامح لوقا كانوا دايما بيسالوا عليا ويتابعوني

-- بصراحة هل كنت بتأخد دروس خصوصية في كل مواد ولا مواد معينة بس؟

- الحقيقه كنت باخد دروس في كل المواد على منصات الاون لاين لمدرسين من القاهرة واسكندرية

-- ما هي نصيحتك لطلاب ثانوية عامة العام القادم؟ -

-- نصيحتي لكل اللي داخلين المرحلة دي.. اقولهم مفيش داعي للقلق سنه وهتعدي زي أي سنة انا مثلا بدأتها جد واهتميت بيها والحمدالله دي نتيجه، بس تعمل اللي عليك عشان متندمش..

-- كلمنا يا كيرلس عن مدي دعم بابا وماما لك؟

-والله كان دعم معنوي كبير من بابا وماما خاصه فترة الامتحانات دايما كانوا يطمنوني متخافش احنا معاك وراضين عنك وعن مجهودك وتعبك، وأنت عملت اللي عليك، وصراحة دا كان يعطيني حافز اكبر وطاقه اكتر، وكمان دعم المادي وتوفير كل الامكانيات اللي أحتاجها من دروس في كل مواد، ومذكرات تنزل اشتريها يعني حساب مفتوح قدامي..

-- ماذا تقول في هذة اللحظه؟ ولمن؟

- أقول مبروك لصاحبي كيرلس أديب جوده نجاحك وتفوقك أنت كمان ، وأحب أشكره لأننا كنا بنذاكر مع بعض ونحل امتحانات وأسئلة كتير وساعدنا بعض كل واحد كان سند للتاني. فحبيت اقوله شكرآ ياكيرلس يا صاحبي الجدع