بالفيديو.. رد مرتضى منصور على اعتذار شيكابالا وقراره بشأنه

قال المستشار مرتضى منصور ، رئيس نادي الزمالك ، تعليقا على اعتذار اللاعب محمود عبدالرازق شيكابالا ، إن «التصرف الذي عمله غير محترم، ولا ينم عن إن بني آدم عنده مسؤولية والزمالك مش محتاجه، الزمالك عنده لاعيبة كتير في مركزه، والحمد لله أخدنا الدوري، ودا ميمنعش إنه لاعب موهوب».

وأضاف في مداخلة هاتفية لبرنامج «صدي الملاعب» على قناة «صدى البلد»: «أنا قلتله قبل كدة إنت عندك كنز استراتيجي من الموهبة، والموهبة زي الفلوس في البنك، كل ما تاخد منها بتنقص، وأنا اللي بلغته بميعاد المؤتمر، ساعة لما جالي النادي ووطى على دماغي باسها، وقاللي إنت عملت معايا أكتر من أبويا، قلتله أنا عايزك تطلع من الزمالك على الإسماعيلي بشكل محترم، وقلتله إني هدعي رئيس نادي الإسماعيلي ومديره الفني علشان يحضروا المؤتمر، بحيث تطلع بشكل راقي».

وتابع: «أنا عرفت إنه راح لأحمد الفيلا في مراسي، والغلطة الكبيرة إنه قال أنا ماعرفتش ميعاد المؤتمر، لو قال أنا عرفت بس مش عايز أطلع مع الإعلام، أو بأي حجة تانية، والأخ خالد الغندور كلمني وكان عايز ياكل سبق، وقلتله إنه لو كان عايز يعمل مؤتمر يعمله في الزمالك أو الإسماعيلي».

وأشار رئيس نادي الزمالك إلى أن «اللي كاتب البيان أمير ابني، وأنا أولادي أمير وأحمد زمالكاوية جدا وأنا بحترم إخلاصه لصاحبه (شيكابالا)، وأنا مش ماسك سيف يا أحمد، أنا بدي عقوبة أو باخد موقف علشان يحصل انضباط، وأنا كرئيس نادي مش سياف، وأنا لما بعاقب لاعب طبقا للائحة مش بيقى بيني وبينه خصومه شخصية، وأنا أخدت قرار إنه بعد ما يعمل مؤتمر صحفي لكل الناس ويعتذرلهم أنا مش هحضره لا أنا ولا أحمد مرتضى، وأنا عارف إن ميدو بيكلم أعضاء مجلس الإدارة، فيا ميدو بدل ما تلكم أعضاء مجلس الإدارة كلمني، اقسم بالله أنا هحضرالاجتماع لمدة دقيقة واحدة، وأنا مش مضرور إن شيكابالا يرجع الإسماعيلي، والفلوس كانت موجودة فقلتلهم هاتوا بيها سيراميك».

واستطرد: «أنا بقول لشيكابالا إنت غلطت وشعرت بخطأك فهتعمل مؤتمر بكرة ولا بعده، عايز تعلمه في نادي الزمالك اعمله، والإعلاميين اللي حضروا وأنت مجيلتهمش هتعتذرلهم الأول، وبعدين هتعتذر للزمالك، إنت اعتذرت وخلاص مفيش مشكلة، وخلي الناس تسمع وجهة نظرك، ورأيك».

وفي النهاية، أكد «منصور» أنه «عقب اعتذار اللاعب محمود عبدالرازق شيكابالا، في المؤتمر الذي سيقيمه، بأي مكان يختاره، سيجتمع مجلس إدارة نادي الزمالك، في جلسة على الهواء داخل النادي، واللي هيقوله مجلس الإدارة هو اللي هيمشي»، موضحا أنه لن يحضر الجلسة لا هو ولا نجله أحمد.

وكان «شيكابالا »، لاعب سبورتنج لشبونة البرتغالي، أصدر بيانا تقدم فيه باعتذار لناديي الزمالك والإسماعيلي عن عدم حضوره المؤتمر الصحفي الخاص بتوقيع عقود عودته للزمالك، من ثم إعارته للإسماعيلي.

وشدد في بيانه على أنه كان يعلم بموعد المؤتمر، ولكنه لم يعلم بضرورة حضوره، خاصة أنه، كما ذكر، لأنه لا يجيد التعامل مع الإعلام.