السيسي لرجال الجيش: شرفتم مصر

وجّه الرئيس عبد الفتاح السيسي، خلال زيارته لمواقع عسكرية في سيناء، رسالة للشعب، قائلًا: «لا تقلقوا في بسيناء رجال على كل حدودنا، والرجال دول موجودين عشان يحافظوا على مصر، وإحنا مطمنين للقوات المسلحة، وأداء رجالها، والأمور مستقرة تمامًا في سيناء».

وتابع: «حادث اغتيال النائب العام كانت رسالة لإسكات صوت الشعب، وردًا على خروج الشعب في 30 يونيو، واغتالوا محامي الشعب، وبعد سقوط نظام فاشي في 3 يوليو، حبوا يوصلوا لينا أنهم هيعملوا ولاية سموها إسلامية بالقوة في سيناء، ورفح والشيخ زويد لا يمثلان 1% من مساحة سيناء، والترتيب مكنش جوه سيناء فقط».

وأوضح: «اللي حصل ده كان مخطط بقوة، وهما عارفين أننا أصحاب مبادئ، ولا يمكن أننا نضحي بمدنيين في سبيل محاربة الإرهاب، والساعة 7 الأربعاء الماضي، كان عندي كل تطورات الموقف، وكنت مطمن أوي عليكم».

وتابع: «الجيش بيقدم تضحيات في سبيل مكافحة الأعداء، وأقدم التعازي باسم مصر وشعبها لكل بيت مصري قدم شهيد أو مصاب، وده تمن يتم تقديمه من جانب الشعب للحفاظ على مصر».

وأردف: «يا شعب مصر أنتم متعرفوش حجم الخساير اللي سببه الجيش المصري في أهل الشر، وقتلنا أكثر من 200 فرد، وأكتر، ولا يمكن حد أن يفرض على المصريين حاجة هما مش عايزينه، وطول ما الجيش موجود محدش هيروع المصريين ويقهر إرادتهم».

واستطرد: «1 % من القوات المسلحة موجود بس في سيناء، والطلعات الجوية دي و1 % من قوة الجيش، والجيش ممكن يعمل أكتر من كده ألف مرة، وممكن ينهي ده في أي وقت ولكن خايف على المدنيين، وأحنا في حرب جيل رابع، والمستهدف إرادة المصريين، وبعض الإعلام حاول التأثير في إرادة المصريين».

وتابع: «الشعب عارف لما خرج من سنتين إن ده يحصل وهما مستعدين يدفعوا التمن من خلال أولاهم في الجيش والشرطة، واللي حصل يوم الأربعاء كان يستهدف مصر وكرامتها، وأنتم رديتم بجلاء وعزة واقتدار، والنتائج تشرف مصر وجيشها».

وأردف: «أهل الشر مكنش متوقعين أننا هنقدر نقتل منهم كل ده، وبجد اللي حصل ده حاجة تشرف مصر وشعبها، شكرًا ليكم».

وتابع: «العالم عرف أن مصر عماد وضمان لاستقرار المنطقة والدنيا كلها، وأيقنوا أن مصر تقوم بدور حضاري وأخلاقي وديني عظيم في ظل ظروف صعبة، وأنا في نهاية كلامي بوجه شكري للقوات المسلحة وأجهزة الدولة وأحنا مطمنين أوي على الواقع اللي ماشيين فيه والمستقبل اللي عايزينه، ويوم 6 أغسطس قادم، وأهل الشر عايزين يؤذونا ومش هيقدروا، والموضوع ثقة في الله، وجوانب الخير اللي كلنا بنتحرك فيها، وأحنا بنهدف للبناء والتعمير واستقرار الناس، ولا يمكن عمل الخير ربنا ميساعدهوش»، موجهًا رسالة للجنود: «مصر متعلقة في رقبتنا كلنا»، شاكرًا أهالي سيناء، لدفعهم ثمن كبير في مجابهة قوى الشر.